Chuemilch

Chuemilch isch e wissligi, undurchsichdigi Löösig bzw. kolloidali Dispersion vo Proteine, Milchzucker und Milchfett in Wasser, wo vo dr Milchchue stammt. In de mäiste öiropäische Kulture mäint mä mit em Begriff Milch Chuemilch, und für anderi Milcharte wie Gäissemilch usw. brucht mä dr Naame vom Dier, wo d Milch broduziert.

E Glaas Chuemilch

Milchchue bim Wäide

Dr Mensch het vor öbbe 8'500 Joor vor allem in Südostöiropa Uurochse (Ur) afo domestiziere für iir Fläisch und iiri Milch. Im Lauf vo dr Zit si Chuerasse züchdet worde, wo druf spezialisert gsi si, ass si e Hufe Milch gääbe. Chuemilch wird as Roomilch oder verarbäiteti Milch (bastörisiert usw.) drunke und au zu haltbarere wie Chääs Brodukt verarbäitet.

Chuemilch bestoot us öbbe 87 Brozänt Wasser, 4,8 Brozänt Choolehüdraat, 4,2 Brozänt Milchfett, 3,5 Brozänt Äiwiss, und 0,7 Brozänt Spurenelimänt. Si isch vo de wichdigste Milcharte villicht dr Muetermilch am äänligste, het aber e chli mee Äiwiss und e chli weniger Choolehüdrat.