L’Allegro, il Penseroso ed il Moderato

L’Allegro, il Penseroso ed il Moderato (HWV 55) isch en Oratorium in drei Däil vom Georg Friedrich Händel.

Wie s entstande isch

Dr Händel dr erst Däil am 19. Januar 1740 afo komponiere und isch säggs Daag spööter fertig worde. Dr zwäit Däil het er am 2. Februar, dr dritt am 4. Februar fertiggschriibe. D Instrumentierig und s Usfülle vo de Middelstimme isch am 9. Februar baraat gsi.

D Uruffüerig vom Wärk het am 27. Februar im Theater in Lincoln’s Inn Fields stattgfunde. D Gsangssoliste bi derw Vorstellig si gsi:

d Elisabeth du Parc, gnennt La Francesina (Sopran)
dr John Beard (Tenor)
dr Thomas Reinhold (Bass)
e Buebesopran

L’Allegro isch scho bi de erste Uffüerige e groosse Erfolg gsi. Im erste Joor het s fümf Vorstellige gee, Im Januar 1741 isch s Oratorium am gliiche Theater nonemol im Spiilblaan gsi und isch mit e baar Nummere ergänzt worde. Wäärend dr Vorberäitigszit für d Erstuffüerig vom Messiah het s vom Dezember 1741 bis Merz 1742 Uffüerige in dr New Music Hall z Dublin gee.

Witeri Uffüerige z London het s 1743, 1754 und 1755 gee. Für die het dr Händel dr dritt Däil Il Moderato wäggloo und an sim Blatz die äidäiligi Cäcilienode dri doo.

S Libretto

D Kwelle für e Teggst vom Oratorium si die bäide Dichdige L’Allegro (Frohsinn) und Il Penseroso (Schwermuet), wo dr John Milton din 1632 allegorisch dr Geegesatz zwüsche de bäide Stimmige beschriibe het.

Dr Charles Jennens het us dene Dichdige s Libretto für die erste bäide Däil vom Oratoriums zämmengstellt. Dr Händel het vorgschlaage, ass er drzue e dritte Däil Il Moderato (Määssigung) wurd schriibe, wo aber seer vil chürzer uusechoo isch as die bäide erste Däil.

Litratuur

Hans Joachim Marx: Händels Oratorien, Oden und Serenaten, Vandenhoeck & Ruprecht, 1998, ISBN 978-3-525-27815-4
Albert Scheibler, Julia Evdokimova: Georg Friedrich Händel. Oratorien-Führer, Edition Köln, 1993, ISBN 978-3-928010-04-7

Weblingg

L'Allegro, il Penseroso ed il Moderato: Note im International Music Score Library Project.
D Partitur vo L'Allegro (Händel-Wärkusgoob, uusegee vom Friedrich Chrysander, Leipzig 1859)

Dä Artikel basiert uff ere fräie Übersetzig vum Artikel „L’Allegro,_il_Penseroso_ed_il_Moderato“ vu de.wikipedia.org. E Liste vu de Autore un Versione isch do z finde.