LISTE, the Young Art Fair
| Dialäkt: Baseldütsch |
LISTE, the Young Art Fair isch e jöhrligi Kunstmäss in dr Stadt Basel. Si isch äini vo de wichdigste Entdeckermässe uf dr Wält.
D Galeriste Eva Presenhuber und Peter Kilchmann häi 1995 em Peter Bläuer vorgschlaage, e Mäss z organisiere für jungi Künstler, wil si in de Kunstmässe, wo s scho gee het, z churz chieme. Im Johr druf isch d LISTE gründet worde und het sit denn jedes Johr nöji Galerie vorgstellt und dr letscht Schrei in dr zitgenössische Kunst. D Galerie si nie elter as fümf Johr und d Künstler jünger as vierzgi.
Scho im erste Johr si achtduusig Bsuecher mit 36 Galerie bekannt gmacht worde, und drei Johr druf het d Vernissage vo de Performance-Künstler eläi dreiduusig Lüt aazooge, dobblet so vil wie im Johr vorhär. Vili nöji Galerie häi sich um e Blatz bi dr LISTE grisse und d Organisatoore hai die beste chönne ussueche. Vo deene het d Art Basel e Driddel bi sich akzeptiert, was as gueti Kwaliteetskontrolle dütet wird. Ass d LISTE in dr Middi vom Kunstläbe aachoo isch, zeigt d Daatsach, ass d Nationale Suisse as Briis für dr best Noochwuggsviedeokünstler ihm nid nume e Gäldbriis gid, sondern au e Blatz an dr LISTE verschafft.
Uszeichnige
ändere- 2004 Dr Kulturbriis vo dr Stadt Basel für e Peter Bläuer
Quelle
ändere- D Website vo dr LISTE, abgrüeft am 22. Seprämber 2011
- NZZ Online: Basler Kulturpreis 2004 an Gründer der «LISTE, The Young Art Fair» (Site cha nüme abgrüeft wärde; Suche im Webarchiv) , abgrüeft am 22. Seprämber 2011
- Medienmitteilungen des Kantons Basel-Stadt: Der Basler Kulturpreis 2004 geht an Peter Bläuer Gründer und Leiter der LISTE The Young Art Fair (Site cha nüme abgrüeft wärde; Suche im Webarchiv) , abgrüeft am 22. Seprämber 2011