Lambert vo Spoleto

Dr Lambert vo Spoleto (* öbbe 875; † 15. Oktober 898 z Marengo) isch dr Sohn vom Herzog Guido vo Spoleto us em Huus vo de Widone, Vorfahre vo de Salier, gsi, wo 889 as König Guido II. vo Italie zum ene Nationalkönig worden isch und 891 dr Papst Stephan V. zwunge het, ihn zum Kaiser z chröne.

Lambert von Spoleto
Römische Kaiser, König vo Italie
Regierigsziit	Römische Kaiser: 894–898 König vo Italie: 892/894–896
Titel	Herzog vo Spoleto
Uf d Wält cho	öbbe 875
Gstorbe	15. Oktober 898
Dodesort	Marengo
Begrabe	Piacenza
Vorgänger	Guido vo Spoleto

Si Vater het im Februar 892 dr neu Papst Formosus drzue brocht, dr Lambert zum Mitkaiser z ernenne. Dr Guido isch zwei Johr spöter gstorbe. Dr Lambert het d Chrone gerbt, het se aber scho 896 an dr Arnulf vo Kärnte, wo dr Formosus noch Italie grüeft het, wil ihm d Widone z mächtig worde si, verlore. Noch em Abzug vom Arnulf het dr Lambert Pavia zruggeroberet und dr Graf vo Mailand, dr Maginulf, wo dr Arnulf understützt het, lo chöpfe. Im Herbst het er dr Berengar vo Friaul bi Pavia droffe, und die beide hai Norditalie under sich ufdeilt. Dr Berengar het s Gebiet zwüsche dr Adda und em Po übercho und dr Lambert dr Räscht, so wie s bis 889 gsi isch. Noch em Dod vom Formosus 896 het sich dr Lambert im Johr druf vom Stephan V. zum Kaiser lo chröne und dr dot Formosus für verschiidnigi Verbräche lo verurdeile. Im Arnulf si Salbig isch vom neue Papst Johannes IX. annulliert worde, aber dä het au dr Formosus rehabilitiert. Sibzig Bischöf het dr Lambert z Ravenna versammlet, und die hai d Constitutio Romana vom Lothar I. vo 824 wider bestätigt, wo d Awäseheit vom Kaiser bi dr Papstwahl vorgschriibe het.

Dr Lambert het denn immer no mit em Berengar und em Adalbert vo dr Toscana z due gha. 898 isch dr Adalbert gege Pavia zoge. Dr Kaiser isch südlig vo Mailand in dr Nöchi vo Marengo gsi, het dr Adalbert überrascht und bi Borgo San Donnino gschlage und en as Gfangene noch Pavia brocht. Won er zrugg uf Marengo isch, isch er umcho, mögliigerwiis ermordet vom Hugo, em Maginulf siim Sohn oder im ene Unfall. Er isch z Piacenza begrabe.

Literatur

Georg Gresser: »Lambert v. Spoleto« in Lexikon für Theologie und Kirche, Band 6, Freiburg 1997, Sp. 617-618

Weblingg

• genealogie-mittelalter.de

Vorgänger	Amt	Nochfolger
Guido vo Spoleto	König vo Italie 892/894–896	Arnulf vo Kärnte
	Römische Kaiser 894–898	Arnulf vo Kärnte (Gegekaiser ab 896) Ludwig dr Blindi

Dä Artikel basiert uff ere fräie Übersetzig vum Artikel „Lambert_von_Spoleto“ vu de dütsche Wikipedia. E Liste vu de Autore un Versione isch do z finde.

Dä Artikel basiert uff ere fräie Übersetzig vum Artikel „Lambert_II_of_Spoleto“ vu de englische Wikipedia. E Liste vu de Autore un Versione isch do z finde.