Dr Landroot vom Kanton Basel-Landschaft

Dialäkt: Baseldütsch

S Kantonsparlament vom Schwizer Kanton Basel-Landschaft isch dr Landroot. Er het 90 Mitgliider, und wird zurzit (2011) vom Urs Hess (SVP) bresidiert. Dr Vizebresidänt isch dr Jörg Degen (SP).

Zsämmesetzig und Ufgoobe

Dr Landroot bestoht us 90 Mitgliider. Die wärde noch em Proporzsystem in vier Wahlregione und zwölf Wahlkreis alli vier Johr gwehlt, s letschte Mol am 27. März 2011. D Verdeilig vo de 90 Abgeordnete uf die zwölf Wahlkreis wird noch dr Zahl vo de stimmberächtigte Bürger in jedem Wahlkreis berächnet; jede Wahlkreis het aber mindestens 6 Abgeordneti im Landroot.

As Legislative erloot dr Landroot Gsetz, wo em Volk müesse zur Genähmigung oder Ablähnig underbreitet wärde, es sig denn, mindestens 80 % vo de Landrööt haige dr Gsetzesvorlag zuegstimmt. Usseredäm kontrolliert und überwacht dr Landroot d Arbet vo dr Regierig.

Dr Landroot versammlet sich in dr Regel zwei Mol im Monet (usser im Juli und im August) immer am Donnschdig im Liestlemer Regierigsgebäud. Siini Sitzige si öffentlig.

Gmäss §§ 61 ff. vo dr Kantonsverfassig het dr Landroot die Ufgoobe und Kompetänze:

• Er erloot alli grundlegende und wichdige Bestimmige in dr Form vo Gsetz. Usfüehrendi Bestimmige erloot er in dr Form vo Dekret, sofärn er dur s Gsetz drzue ermächtigt worden isch.

• Er gnähmigt d Staatsverdrääg, wo dr Volksabstimmig underlige und all andere Verdrääg, solang nit dr Regierigsroot zueständig isch.

• Er gnähmigt die grundlegende Blän vo dr kantonale Dätigkeit, bsunders s Regierigsbrogramm und dr Finanzblaan. Er erloot die kantonale Richtblään.

• Er beschliesst – under Vorbehalt vom Finanzreferendum – nöji Usgoobe und setzt im Rahme vom Finanzblaan dr jöhrlig Voraaschlaag fest.

• Er git s Kantonsbürgerrächt an Usländer.

• Er wehlt die kantonale Gricht, d Staatsaawält, dr Finanzkontrollöör, dr Ombudsman, dr Landschriiber und die eidgenössische Gschworene.

• Er reglet d Besoldige, wo dr Kanton müess usrichde, und üebt wiiteri Rächt us, won er dur s Gsetz überchoo het.

Wie alli andere Parlamänt in dr Schwiz (inklusive die beide Bundeschammere Nationaal- und Ständeroot), isch au dr Landroot e Milizparlamänt. Mä erhofft sich vo däm System, ass d Parlamentarier en ängeri Realitäts- und Volksbindig wurde haa als Bruefsparlamentarier. Kritiker gsehn din aber d Gfohr vo dr zitlige und fachlige Überforderig.

Bardeie

Sitzverdeilig im Landroot, 2011

	Fraktion	2011	2007	2003	1999	1995	1991
	Sozialdemokratischi Bardei	21 Sitz	22 Sitz	25 Sitz	25 Sitz	24 Sitz	22 Sitz
	Schwizerischi Volksbardei	24 Sitz	21 Sitz	20 Sitz	14 Sitz	11 Sitz	9 Sitz
	FDP Baselland*	14 Sitz	20 Sitz	19 Sitz	22 Sitz	25 Sitz	27 Sitz
	CVP	8 Sitz	11 Sitz	11 Sitz	12 Sitz	13 Sitz	15 Sitz
	EVP	4 Sitz	4 Sitz	3 Sitz	3 Sitz	4 Sitz	4 Sitz
	Grüeni Bardei**	12 Sitz	11 Sitz	8 Sitz	5 Sitz	6 Sitz	8 Sitz
	Grüenliberali Bardei	3 Sitz	–	–	–	–	–
	BDP	4 Sitz	–	–	–	–	–
	Schwizer Demokrate	0 Sitz	1 Sitz	4 Sitz	9 Sitz	7 Sitz	5 Sitz

NA = Nit aadräte
'* 1991 und 1995 inklusiv 3 Sitz vo dr FDP Laufedaal
'** = 1995 inklusiv 2 Sitz vo dr Freie Grüene Liste

Weblingg

• Webpresänz vom basellandschaftlige Parlamänt