Lentienser

D Lentienser (lat. Lentienses) sind en Tailstamm bzw. Gau (pagus) vo de Alemane gsii, wo nördlich vom Bodesee im Piet vom hütige Linzgau glebt het.

Gschicht

D Lentienser werdet nume vom Ammianus Marcellinus gnennt und bizüchet sich uf Eraignis vo de Joor 355 und 378.

Ane 355 het de römisch Feldherr Arbetio e Stroofzug gege d Lentienser undernoo. Er isch zwoor inene Hinderhalt groote, het denn aber d Lentienser im End doch chöne zruggschloo.

Im Februar 378 sind d Lentienser, nochdem si erfaare hend, as s römische Heer im Oste bischäftigt isch, öber de zuegfrorni Rhii zoge und hend plünderet. Si sind denn zruggschlage wore, aber glii drufabe sind si underem König Priarius zäme mit anderne Alemane wider is Römische Riich iigfale, sind aber vom Chaiser Gratianus i de Schlacht bi Argentovaria abegmacht wore und de Priarius isch gfalle. De Gratianus het d Lentienser bis zu erne Woonsitz verfolgt und si zwunge, em Hilfstruppe z stele.

Name

De Name vo de Lentienser setzt vermuetli e keltische Name fort und isch no hüt im Name vom Linzgau erhalte.

Quelle

• Ammianus Marcellinus 15,4,1; 31,10,2-17; 12,1

Literatur

• Der Neue Pauly, Bd. 7: »Lentienses«.
• Reallexikon der Germanischen Altertumskunde, Bd. 18: »Lentienses«, Berlin 2001, ISBN 3-11-016950-9, S. 266-267.