Luxemburgerli

D Luxemburgerli sind chliini Süessigkeite wo e chlige uusgsend wie farbigi Hamburger. si sind weltbekannt und werded z Züri i de Fabrik vo Lindt & Sprüngli gmacht. E Luxemburgerli bestaht us zwei Makrönli us Mandle, gschlagnigem Eiwiss mit Zucker und ere Crème- oder Ganachefüllig. Jedes Stück het e Durchmesser vo öbbe 2,5 cm.

Luxemburgerli

Härkumft

Erfunde het si dr luxeburgisch Konditer Camille Studer, wo s Rezäpt vom ene französische Zuckerbeck im Johr 1957 mit uf Züri brocht het und es dört im Rahme vom ene intärne Wettbewärb verfiineret het. S Gebäck het üsserlig wie au noch em Gschmack e grossi Ähnlikäit mit de Macarons vom Huus Ladurée z Paris, wo sit em Aafang vom 20. Johrhundert bekannt si, si abr biz chliiner.

Dr Name Luxemburgerli goht uf dr Spitzname vo sim Erfinder zrugg, wo bi sine Kolleege wäge siner Härkumft Luxeburgerli ghäisse het. Baiser de Mousse, frz. für e ‹Schmutz vo Schuum›, wo aagäblig dr ursprünglig Name gsi sig, sig dr Kundschaft e chli piinlig gsi. Si häige anstatt Schmütz s Gebäck vom Luxeburger verlangt, ebe Luxeburgerli.

Vilfalt

Es git e Hufe verschiideni Arte vo Luxeburgerli, aber eigentlig si alli gfüllti Maggeröndli. Die wichdigste Gschmacksrichtige si Vanill, Schoggi, Mokka, Schampanier, Himbeeri, Zitrone, Pistasch. Drzue chömme viil anderi Gschmäck und es git immer wider nöji.