Märzè

Märzèbièr odder abchürzt Märzè isch è untergärigs Vollbièr, wo urschprünglich im März braut worrè isch.

Gschichtè ändere

I dè bayrischè Brauorning anno 1539 un durch è Dekret vom Albrecht V. anno 1553 isch feschtglait worrè, dass nu zwǜschè Michaeli, èm Daag vom Hl. Michaels (29. Septembèr) un Georgi, èm Daag vom Hl. Georgs (23. April) braut wörrè hèt dürfè. I dè füüf Mönèt dènõch isch s Bièrbrauè vobotè gsi. Gründ dõdèfür sin dié höcheri Brandgfòòr i dè Summermönèt bim Bièrsǜdè un diè nötigè niddrigè Temperadurè vo unter zee Grad bim Brauè vom untergärigè Bièr gsi.

Well mò bis zuè dè nägschtè Brausaison nit oone Bièr hèt wellè sy, hèt mò im März è bsunders haaltbares Bièr braut. Sèbb Bièr isch mit mee Stammwürzi, Alkohol un Hopfé gmacht worrè. Glagerèt isch sèll Märzèbièr in düèfè Felsèkeller. Sèlli Keller sin möglichscht mit Naduriis zuèsätzlich abbè küèlt worrè. Sèlli Iismöggè isch meischtens uss nõch glegènè Flüss odder sognenntè Iiswyer odder -teich chò. Um dè Keller un dé Ygang gègèd Wärmi vo dè Sunnèstraalè z schützè, hèt mò d Rosskaschtaniè vor èm Ygang odder übber dè Kellerdeggi pflanzt, wo wèg dè großè Blätter rychlich Schattè spendè düèn, mit irè flachè Wurzlè abber kei Gfòòr für d Deggi dargschtellt hèn. Mäbbèzuè hèt sich unter dè Kaschtanièbäum uss èm jewyligè Brauereiuusschank mit dè Zit diè hüt tǜpisch bayrischè Bièrgärtè bzw. dè fränkische Bièrkeller entwicklèt.

Well s Märzè als stärkers Bièr am längschtè haltbar gsi isch, hèt mò s Märzè zletscht gsoffè, séllèwäg isch meischtens è Märzè am Oktobèrfäscht uusgschenkt worrè. S Bièr, wo hütt uff èm Oktobèrfäscht uusgschenkt wörd, isch abber heller un entschpricht ehnder im Bièrtǜp Wièner Export.

D Bezeichnung Märzèbièr wörd vor allem z Süddütschland un Öschterrych statt dè Kategory Exportbièr für è stärkers Lagerbièr bruucht. Z Öschterrych git s allerdings Unterschyd bi dè Art vom Märzè. S git z Öschterrych ebbèfalls è untergärigs Bièr un è Märzèbièr, wo wit vobreitet isch, sèll isch s österrychische „Standardbièr“. S Standardbièr stòt abber ehnder für è Hèllès, s isch lychter un hèt è bitzeli wènniger Stammwürzi. Dõdemit isch au wènniger Alkohol dinnè, dè lyt durchschnittlich bi 4 % bis 5 %. D Farb vom Bièr isch zuèdèm nit wiè Bärnschtei, sondern wègèm gringèrè Malzghaalt meischtens gääl wiè Stròò. I dè USA brauèd mèngi Brauereiè Märzèbièr im urschprünglichè Styl, in letschter Zit au widder im Bayrischè. S Märzèbièr isch ußerdèmm z Thüringè wit vobreitet.

Weblinggs ändere

Dä Artikel basiert uff ere fräie Übersetzig vu dere Version vum Artikel „Märzenbier“ vu de dütsche Wikipedia. E Liste vu de Autore un Versione isch do z finde.