Marga Höffgen

D Marga Anna Johanna Höffgen (* 26. April 1921 z Mülheim an der Ruhr, i.a.Q. fälschligerwys au: Mille; † 7. Juli 1995 z Mille) isch e dytschi Altischti, wu vor allem as Interpreti vu Oratorie un Passione (bsundersch vum Johann Sebastian Bach) beriemt wiren isch un as Opersängeri mit dr Roll vu dr Erda us Das Rheingold un Siegfried identifiziert woren isch.

Lääben un Karriere

No dr Schuel in ire Haimetstadt Mülheim an der Ruhr het d Marga Höffgen an dr Folkwang-Hochschuel z Essen bi dr Anna Erler-Schnaudt studiert, derno an dr Hochschuel fir Musik Berlin bim Hermann Weißenborn un het 1952 as Kunzärt-Altischti z Berlin in ere Uffierig vu dr Matthäuspassion vum Johann Sebastian Bach unter dr Laitig vum Wilhelm Furtwängler debütiert. Ai Johr speter het si 1953 z Wien in ere Uffierig vu dr glyche Passion unter dr Laitig vum Herbert von Karajan mit dr Wiener Philharmoniker wider en große Erfolg gfyer. Dodermit het iri groß Karriere as Oratorie- un Liedsängeri aagfange.

Si het Kunzärt in ganz Europa gee un het iri Erfolg vor allem bi dr große internazionale Feschtspiilveraastaltige in eme große Repertoire ghaa. Syter 1960 het si bi dr Bayreuther Feschtspiil (1960–64 un 1967–75) un am Royal Opera House Covent Garden z London gsunge, an dr Wiener Staatsoper un am Teatro Colón z Buenos Aires, un zwar u. a. immer wider gärn d Opere-Roll vu dr Erda in s Richard Wagners Der Ring des Nibelungen. Bi dr Feschtspiil vu Bayreuth het si 1964 un 1967–75 au di 1. Norn in dr »Götterdämmerung« gsunge. Im Lauf vu ire große Karriere het si no unter dr Laitig vum Karl Böhm, Eugen Jochum, Kurt Thomas, Günther Ramin, Karl Münchinger, Karl Richter un Helmuth Rilling un au unter dr Dirgänte, wu unte ufgfiert sin.

Zue ire andere Bihnerolle hän d Filipjewna im »Eugen Onegin« vum Tschaikowsky un d Arnalta in s Monteverdis »Incoronazione di Poppea« ghert.

Familie

Si isch ghyrote gsii mit em Dirigänt vum Fryburger Bachchor Theodor Egel (1915–93) un het mit ihm z Mille gläbt. Di jingscht Dochter Barbara Egel-Nicolescu (Altischti) het au ne erfolgrychi Karriere as Sängeri ghaa. Ire Zwillingsbrueder Thomas Egel-Goldschmidt isch Brofässer fir Violine an dr Musikhochschuel Würzburg un schafft näbehär as Moler un Bildhauer in sym Atelier z Mille. Dr Martin Egel, en andere Suhn, isch au ne erfolgryche Sänger wore. Dr eltscht Suhn Hanspeter Egel-Fischer het as Sänger, Regisseur un Dramaturg an verschidene Theater gschafft un letscht as Schefdramaturg am Bremer Theater.

Ehrige

• 1976: Ernännig zur Chammersängeri dur d Landesregierig vu Bade-Wirttebärg
• 1988: Verdienschtchryz 1. Klasse vu dr Bundesrepublik Dytschland

Diskografy

Opere

• Die Meistersinger von Nürnberg – mit Rudolf Kempe, 1956
• Das Rheingold – mit Rudolf Kempe, 1960
• Siegfried – mit Georg Solti, 1962
• Die Zauberflöte – mit Otto Klemperer, 1964
• Der Evangelimann – mit Robert Heger, 1965
• Götterdämmerung – mit Karl Böhm, 1967

Passione, Oratorie, Mässe

• Missa Sanctae Ceciliae (Cäcilien-Messe, J. Haydn) mit Eugen Jochum, Chor-Orcheschter Bayerischer Rundfunk 1959
• Johannes-Passion – mit Eugen Jochum, 1967
• Matthäus-Passion – mit Karl Münchinger, 1964
• Matthäus-Passion – mit Fritz Wunderlich, 1965
• Matthäus-Passion – mit Eugen Jochum, 1966
• Matthäus-Passion – mit Karl Richter, 1969
• Verdi-Requiem – mit Hans-Müller Kray, 1960
• Mozart Requiem – mit Rudolf Kempe, 1955
• h-Moll Messe – mit Herbert von Karajan, 1952
• h-Moll Messe – mit Karl Richter, 1969

Literatur

• Stadt Mülheim an der Ruhr (Hrsg.): Ruhrpreis für Kunst und Wissenschaft 1962-1974, S. 47–50.
• Horst Ferdinand: Marga Höffgen. In: Baden-Württembergische Biographien. Bd. 4, S. 152–154 (online)

Weblinks

• Biografy mit Foto
• Marga Höffgen. In: Bayerisches Musiker-Lexikon Online (BMLO).
• bayreuther-festspiele.de Biografy vu dr Marga Höffgen

Fueßnote

Dä Artikel basiert uff ere fräie Übersetzig vu dere Version vum Artikel „Marga_Höffgen“ vu de dütsche Wikipedia. E Liste vu de Autore un Versione isch do z finde.