Hauptmenü ufmache
Dialäkt: Schwäbisch
Marie Kurz

D Marie Kurz geborene von Brunnow (* 6. Auguscht 1826 z Ulm, † 26. Juni 1911 en Mincha) isch a deitscha Pazifischdin, Sozialischdin, d Frau vom Dichter Hermann Kurz ond d Muadr vo dr Schriftstellere Isolde Kurz gwäa.

Aus ihrem LeabaBearbeite

D Marie von Brunnow ischt am 6. Auguscht 1826 z Ulm uf d Welt komma. Ufgwagsa ischt-se en Stuegert ond z Ludwigsburg. Wia des Mädle zwelf Johr alt gwäa ischt, hot sich ihr Vaddr vom Milidär en Ruhestand vrsetza lau ond a Landguad en Oberesslenga kauft. Deet-nô ischt d Familie von Brunnow 1838 omzoga. Dr Vaddr hot drfir gsorgt, dass sei Dechterle a omfassenda Bildong kriagt hot, was fir a Frau em 19. Johrhondert et selbvrständlich gwäa ischt. Ganz bsondrs gschätzt hot des Mädle d Litradur ond s Zeitalder vo dr Antike. Ufgschlossa gwäa isch-se au fir-em Karl Marx sei Filosofii ond vrabscheit hot-se älle Gedanka, wo em kloischda Senn mit-em Kriag zo doa ghet hend. So isch s au koi Wonder, dass sich dui Frau en dr Revoluzioo vo 1848 uf d Seit vo de Ufstendische gschlaga, revoluzionäre Reda gschwonga ond polidische Manifescht vrfasst hot. Gar et leida kenna hot se selle birgerliche Kloidrvorschrifda, ond drom hot se grad zom Bossa a beierlicha Tracht traga, om so dô drgega ihr Abneigong zo zeiga.

Am 23. Februar vo sellem Revoluzionsjohr hot d Marie von Brunnow z Esslenga da Hermann Kurz kennaglernt. Dia zwoi hend sich prächdich vrstanda, ond drei Johr schbätr send se mitnandr vôr da Altar tredda. Dô drbei hot d Marie von Brunnow bewusst ihrn Adlstitl aaglegt ond da Familianama vo ihrem Môô ôôgnomma, om so ihr liborala demokradischa Gsennong zo zeiga. Zamma hot des Ehepaar em Lauf dr Zeit fenf Kendr s Leaba gschenkt: viir Buaba ond oi Mädle. Des Mädle isch schbätr en d Fuaßstapfa vom Vaddr tredda ond als Isolde Kurz selbr a berihmda Schriftstellere worra. Mit ihrem Buach „Meine Mutter“ hot se-ra a litrarischs Denkmal gsetzt.

Am 10. Oktobr 1873 isch d Marie Kurz em Altr vo 47 Johr Witwe worra, nôchdem ihr Hermann a de Folga vo-ma Sonnastich ibrraschend s Zeitliche gsegnet hot. Bald druf hot-se ihr Wohnong z Diibenga ufgäa ond ischt nôch ihrem Sehnsuchtsland Italia zoga. Erscht em Johr 1910 ischt-se nôch Deitschland zruckkomma ond hot en Mincha, ganz e dr Näh vo ihrer Dochter Isolde, a Wohnong bezoga. Deet hot-se am 26. Juni 1911 da ledschda Schnaufer doa. Beigsetzt worra ischt ihr Urne en Diibenga, bloß a baar Metr weit weg vo ihrem Hermann.

LitradurBearbeite

  • Dora Schlatter: Marie Kurz, [geborene von Brunnow] – ein Lebensbild. Basel u. a., Reinhardt, 1907
  • Isolde Kurz: Meine Mutter. Tübingen : Wunderlich, 1926.

WeblinkBearbeite

  Dä Artikel basiert uff ere fräie Übersetzig vu dere Version vum Artikel „Marie_Kurz“ vu de dütsche Wikipedia.

E Liste vu de Autore un Versione isch do z finde.