Messene

Messene (altgriech. Μεσσήνη, Messēnē; dorisch: Μεσσάνα, Messānā) isch en antiki Stadt gsii, wo ane 369 v. Chr. gründet woren isch und denn d Hoptstadt vo Messenie woren isch. Di antiki Stadt isch guet erforscht und ono zimmli guet erhalte. Si litt bim hüttige Dorf Mavromati.

s antike Theater mit em Dorf Mavromati am Abhang vo de Ithome

s Stadion vo Messene

Laag

Messene litt am Abhang vo de Berge Ithome und Eua und isch vo Natuur uus guet gschützt. D Akropolis isch uf de Ithome glege, vo wos e gueti Fernsicht öber di Messenischi Ebni gitt.

Gschicht

Bim Berg Ithome hets scho i de archaische Zitt e Sidlig ggee, wo no Ithome ghaisse hett. Do hend sich o d Messenier bim Heloteuufstand gege Sparta verschanzt. Noch de Schlacht vo Leuktra ane 371 v. Chr. isch Messenie vo Sparta trennt wore und de Epameinondas hett zäme mitem Epiteles e Stadt gründet. Die hett zerst no Ithome ghaisse. I dere Stadt sind di vertribne Messenier noi agsidlet wore, aber o anderi Sidler hend sich do niderloo. S Piet vom Stadtstaat hett em Aafang nume e Tail vo Messenie umfasst.

Archäologii

D Stadtmuur vo Messene isch zimmli guet erhalte und messt im Umfang nüü Kilomeeter. S Zentrum vo de Stadt bildet d Asklepieion, wo süüdlich vo de Agora gstanden isch. Denebet hetts no anderi Temple ggee und e Gymnasion.

Literatur

• Petros G. Themelis: Das antike Messene. Athen, TAP 2003. ISBN 960-214-206-5.
• Silke Müth: Eigene Wege: Topographie und Stadtplan von Messene in spätklassisch-hellenistischer Zeit. Rahden/Westf. 2007 (Internationale Archäologie, Bd. 99). ISSN 0939-561X
• Eva Maria Lang, Waltraud Sperlich: Messene: die erträumte Metropole. Kalamata, Lyso 2005. ISBN 960-630-274-1. vili Bildli (Memento vom 11. April 2008 im Internet Archive)
• Claus Reinholdt: Das Brunnenhaus der Arsinoë in Messene. Nutzarchitektur, Repräsentationsbaukunst und Hydrotechnologie im Rahmen hellenistisch-römischer Wasserversorgung. Wien 2009. ISBN 978-3-85161-024-6