Museum für Wasser, Bad und Design

S Museum für Wasser, Bad und Design (au: Hansgrohe-Museum) isch e privat Museum vum Sanitärunternäme Hansgrohe im bade-wirttebärgische Schilda, wu au dr Sitz vu dr Firma isch.

Gschicht un Uusrichtig ändere

S Museum isch anne 1997 am Stammsitz vum Unternäme grindet wore. 2002 isch d Uusstellig in d Schildacher Aue verlait wore un isch as Wanderuustellig z Dytschland unterwägs gsii, voreb s Museum nei ufgmacht woren isch. Unter anderem isch d Uusstellig im Dytsche Museum z Minche, im Museum vu dr Alldagskultur, in Schloss Waldebuech un im Altonaer Museum z Hamburg z sääne gsii. Syter 2007 isch s Museum in s Schueligs- un Uusstelligszäntrum Hansgrohe-Aquademie yybunde.[1]

S Museum soll di europäisch Badkultur syt em Mittelalter zaige, derzue d Entwicklig vum Sanitärhandwärch vum Blächner zum Inschtallateur un d Gschicht vu dr Wasserversorgig. Au d Unternämesgschicht vu Hansgrohe wird dargstellt. Mit historische Exponat wäre 700 Johr „Badkultur“ presäntiert, vum Hämbecki iber d Badwanne bis zue dr modärne Duschi.

Exponat ändere

E Blächnerwärchstatt us em Johr Jahr 1910 zaigt di alte Wärchzyyg un mit handwärchlige Gschick dodemol Chuchigschiir, Latärne un Gfäß produziert wore sin. Si liferet au Informatione iber d Gschicht vum Sanitärfachhandwärch. Historischi Badwanne us Chupfer, uf Hochglanz poliert oder chunschtvoll mit Mahagoni verchlaidet, vermittle ne yydruck vu Pomp un Pracht im Privatbad, wie s Ändi 19. Johrhundert dr „obere Zeedöusert“ vorbhalte gsii isch. Im Lauf vu dr Zyt het mer d Wanne us hygienische Grind nodisno vu dr Schlofchammere in aigeni Ryyn due, wu no aus dr Kloo gsii isch.

Mit syre historische Sammlig zaigt s Museum nit nume d Glanzsyte vu dr Badgschicht. Di maischte Lyt hän no aafangs 20. Johrhundert aimol in dr Wuche in dr Weschhuchi badet. D Entwicklig in dr Johr noch em Zweete Wältchrieg zaige ne Platteböubad un Bäder us dr 1950er, 1960er un 1970er Johr. Bim Rundgang dur d Gschicht vu dr Sanitärtächnik entdecke Bsuecher*ne au modärni Klassiker, e Dail dervu Hansgrohe-Produkt, z. B. di erscht verstellbar Handbruusi „Selecta“ un di erscht farbig Armatur „Uno“, wu 1986 mit em iF Designbryys uuszaichnet woren isch. In jingschter Zyt het si dr franzesisch Designer Philippe Starck mit em Thema Bad ussenandergsetzt.

Literatur ändere

  • Schiltach, Hansgrohe-Museum. In: Museumsblatt. Portraits baden-württembergischer Museen. Nr. 39 (März 2005), ISSN 0939-6373, S. 36.

Weblink ändere

Fueßnote ändere

  1. Netmuseum - Museen & Ausstellungen in Baden-Württemberg. Archiviert vom Original am 24. Februar 2016; abgruefen am 2. Dezember 2020.

Koordinate: 48° 17′ 27″ N, 8° 20′ 50,1″ O

  Dä Artikel basiert uff ere fräie Übersetzig vu dere Version vum Artikel „Museum_für_Wasser,_Bad_und_Design“ vu de dütsche Wikipedia. E Liste vu de Autore un Versione isch do z finde.