Nöiji Wildi

As Nöiji Wildi oder Nöiji Heftigi, wärde Künstler bezäichnet, wo in de früeje 1980er Joor mit ere subjektive, umbekümmerete und lääbensbejooende Moolerei z Dütschland und in Östriich an d Öffentligkäit dräte si. Dr Naame häi si überchoo, wil si an die franzöösische Fauves, d. h. Wilde, erinneret häi, wo am Aafang vom 20. Joorhundert z Bariis Furore gmacht häi. Die Nöije Wilde häi mit iire Wärk die gnormte Wärtmaassstääb vo de bürgerlige Vorstellige kommentiert. Si häi mit iire Bilder, wo vilmol in dunkle Döön ghalte si, gege d Apathii vo de 1980er Joor, wo us em Woolstand choo isch, revoltiert. Si häi dr dradizionelli Kunstbegriff demontiert und si eso in dr Dradizioon vom Dada und Fluxus gstande.

Rainer Fetting: Statue vom Willi Brandt z Stockholm

Stilistischi Kennzäiche

E Hauptmerkmol vo dr Kunstrichdig si die groossformatige Bilder mit iirer bedoont moolerische Moolwiis und iirer ziilte Formlosigkäit, eme schwungvolle und heftige Bimselstrich und chreftige Farbe. D Bilder chönne expressiv abstrakt si, sinnlig geegeständlig, neon-grell, odr mit Graffiti-Elemänt dursetzt. Si si us de individuelle Empfindige vo de Künstler und iirem Sälbstdarstelligsbedürfnis entstande.

Vertreter vo de Nöije Wilde sin

• Berlin: Luciano Castelli, Rainer Fetting, Helmut Middendorf, Salomé, Bernd Zimmer, Elvira Bach, Anne Jud, Berthold Schepers, Rolf von Bergmann
• Dresden: A. R. Penck
• Düsseldorf: Moritz Reichelt, Albert Oehlen, Markus Oehlen, Martin Kippenberger, Werner Büttner, Horst Gläsker
• Köln: Hans Peter Adamski, Peter Bömmels, Walter Dahn, Jiří Georg Dokoupil, Leiko Ikemura, Gerard Kever, Gerhard Naschberger, Stefan Szczesny, Volker Tannert
• Östrich: Siegfried Anzinger, Erwin Bohatsch, Herbert Brandl, Gunter Damisch, Thomas Reinhold, Hubert Scheibl, Hubert Schmalix
• Schwiiz: Martin Disler

Liddratuur

• Florian Steininger: Neue Wilde: Eine Entwicklung /A Progression. Edition Sammlung Essl, 2004, ISBN 3-902001135
• Götz Adriani: Obsessive Malerei. Ein Rückblick auf die Neuen Wilden. Hatje Cantz Verlag, Ostfildern 2003, ISBN 3-7757-9179-5
• Heinrich Klotz: Die neuen Wilden in Berlin. Klett-Cotta Verlag, Stuttgart 1984, ISBN 3-608-76159-4

Weblingg

• Kunstlexikon vom P.W. Hartmann

Dä Artikel basiert uff ere fräie Übersetzig vum Artikel „Neue_Wilde“ vu de dütsche Wikipedia. E Liste vu de Autore un Versione isch do z finde.