S Nöijen Orkhester Baasel
| Dialäkt: Baaseldütsch |
S Nöijen Orkhester Baasel (NOB) isch e Sümfoniiorkhester, wo z Baasel dehäi isch. Dr ungarisch Dirigänt Bela Guyas, wo 2012 gstorbe isch, het s im Joor 1982 gründet und sit 2012 wird s vom Christian Knüsel gläitet.
Gschicht
ändereS Orkhester het bis jetz mee as 350 Konzärt z Baasel und in dr Nordwestschwiz veraastaltet. Do drzue chömme Ufdritt in dr Regioonä in andere Schwizer Stedt und im Usland. Wichdig für s Orkhester isch d Förderig vom Noochwuggs. Es isch zämmegsetzt us junge Bruefsmusiker und git Soliste, wo am ufstiige sin, e Blattform.
En andere wichdige Aspäkt isch, ass es in dr Regioon verankeret isch. S Nöije Orkhester Baasel förderet lokali Künstler und veraastaltet Konzärt in dr ganze Regioon, vor allem in de Kantöön Baaselstadt und Baaselland. Si Briisbolitik will s mööglig mache, ass alli, wo dra intressiert si, klassischi Muusig chönne erlääbe. Es git zwäi Abonnemänt für je siibe verschidnigi Brogramm, wo in dr Martinskirche z Baasel und an andere Ort in dr Regioon Baasel ufgfüert wärde. Drzue chömme zwäi Äxtrakonzärt und zwäi Gastspiil bro Säsoo.
Zu de Brioridäte vom Orkhester ghöört näben em Angaschmaa für dradizionelli Wärt und für musikalischi Mäisterwärk au d Förderig vo dr Kreatiwidät vo junge Kunstschaffende mit innovative Brojekt. Dorum bringt s NOB immer wider nöiji Format uuse, zum Bischbil e Schriibwettbewärb für Baasler Schüeler, e Komposizioonsuufdrag oder e Vermiddligsbrojekt, wo Jugendligi us underschiidlige soziale Schichte zsämmebringt. S NOB brobiert in sine Aktividääte kulturells und sozials Angaschmaa z kombiniere. Es het vor, mit verschidnige Instituzioone zämmezschaffe, wie mit Altershäim oder mit dr internazionaale Organisazioon PLAYforRIGHTS, wo sich für Menscherächt iisetzt über multimediali Vermiddlig vo Kunst.