Nikolaus vo Oresme

Dr Nikolaus vo Oresme (* vor 1330 in dr Normandii; † 11. Juli 1382 z Lisieux, Frankriich; au Nicolas Oresme, Nicholas Oresme, Nicole Oresme) isch e Bischof gsi und äine vo de bedütendste Naturwüsseschaftler und Filosoofe im 14. Joorhundert.

Lääbe

1348 het er Theologii am Kolleg vo Navarra z Bariis afo studiere, acht Joor spööter isch er dr Läiter (grand-maitre) vo däm Kolleg worde. 1361 isch er Archidiakon vo Bayeux und 1362 Kanonikus z Rouen worde. In dr Zit vo 1370 bis 1377 het er im Ufdraag vom franzöösische Köönig Schrifte vom Aristoteles us em Latiinische ins Französische übersetzt. Im Joor 1377 isch er zum Bischof vo Lisieux gweelt worde.

Wüsseschaftligi Arbäite und Läistige

Dr Oresme isch mit em Wilhelm vo Ockham und em Johannes Buridan äine vo de iiflussriichste Leerer und Dänker vo sinere Zit gsi. Er isch Theologe und Berooter vom Köönigshuus gsi, het sich für naturwüsseschaftligi Brobleem intressiert und isch e Gegner vo dr Astrologii gsi. Er isch au as Übersetzer vo antike Schrifte ins Französische bekannt worde und het gwüsst, wie mä d Wüsseschaft vo sinere Zit populär cha vermiddle.

Dr Oresme wird vilmol as Vorlöifer vo de modärne Naturwüsseschafte aagluegt, aber er isch doch in dr dradizionelle Scholastik verhafdet gsi, au wenn er Däil vo dr Leer vom Aristoteles kritisiert het. Er het zum Bischbil dänggt, ass s geozentrische Süsteem vom Aristoteles nid plausibler sig as s heliozentrische Süsteem.

Er het immer brobiert z zäige, ass natürligi Erschinige natürligi Ursache häi und nid überirdischi.

Litratuur

Hendrik Mäkeler: Nicolas Oresme und Gabriel Biel. Zur Geldtheorie im späten Mittelalter, in: Scripta Mercaturae. Zeitschrift für Wirtschafts- und Sozialgeschichte 37 (2003) 1, S. 56-94.
Jakob Hans Josef Schneider: Nikolaus von Oresme. In: Biographisch-Bibliographisches Kirchenlexikon (BBKL). Band 6, Herzberg 1993, ISBN 3-88309-044-1, Sp. 1238–1252.

Weblingg

Stefan Kirschner: „Nicole Oresme“ in dr Stanford Encyclopedia of Philosophy (änglisch, mit Literaturaagabe)
Ulrich Taschow: Ardikel über s Lääbe vom Oresme und sini wüsseschaftlige Läistige (ängl.) (inkl. Bibliographii)

Dä Artikel basiert uff ere fräie Übersetzig vum Artikel „Nikolaus_von_Oresme“ vu de dütsche Wikipedia. E Liste vu de Autore un Versione isch do z finde.