S Ortsmuseum Muttez
S Ortsmuseum Muttez isch e chliises Museum in de obere Stöck vom Muttezer Füürweermagazin an dr Schuelhuusstrooss 15, wo in de früeje 1970er Joor iigrichdet worde isch. Es bestoot us zwäi Däil, em lokalhistorische und dr Sammlig Karl Jauslin im Estrigg. D Sammlige vom Museum si dänggmolgschützt.
| Dialäkt: Baaseldütsch |
S Museum isch jede Moned am letschte Sunndig am Nomidaag offe, usser im Juli und Dezämber.[1] Dr Iidritt isch gratis.
D Sammlige ändere
Dr Beriich bim Iigang im erste Stock isch em Muttezer Veräinslääbe gwidmet mit historische Veräinsfaane und andere Objekt. Witer ine si Modäll, historischi Fotene und Fünd usgstellt, wo die eltiste von ene in d Stäizit zruggöön.[2]
Zum Ortsmuseum ghöört au d Sammlig vo Güeter- und Gränzstäi im Hoof vo dr Arbogast-Chille am Chilleblatz, wo mä jeede Daag gratis cha go bschaue.[2]
Im Estrig isch d Jauslin Sammlig, wo im Kunstmooler Karl Jauslin gwidmet isch. Dr Jauslin isch vor allem as Historiemooler und Illustrator bekannt worde, und sini "Bilder aus der Schweizergeschichte" häi s Gschichtsbild vo de Schwizer no bis ins 20. Joorhundert brägt.[1]
Fuessnoote ändere
- ↑ 1,0 1,1 «museen muttenz» (Memento vom 2. Juni 2014 im Internet Archive), abgrüeft am 1. Mai 2014
- ↑ 2,0 2,1 «Museen» uf dr Website vo dr Gmäind Muttez, abgrüeft am 1. Mai 2014
Koordinate: 47° 31′ N, 7° 39′ O; CH1903: 615731 / 263735