Peter Mengis

Dialäkt: Baseldütsch

Dr Peter Mengis (1769–1856) isch dr letscht Hänker vo dr Stadt Baasel gsi.

Lääbe und Amt

D Mengis si sit 1582 z Rhiifälde Scharfrichter gsi. 1766 isch dr Martin Mengis as Hänker uf Baasel choo und si Soon Peter het dr Boste im Joor 1804 von em gerbt.

Am 4. August 1819 het dr Peter Mengis uf em Kopfabheini vor em Stäinedoor drei Stroosseröiber und Mörder, dr Ferdinand Deisler, dr Xaver Herrmann und dr Jakob Föller, vor 20'000 Zueschauer mit em Schwärt köpft, und das isch die letschti Hiirichdig in dr Stadt Baasel gsi. Am 30. Juni 1838 isch dr Mengis vo sim Amt zruggdräte und d Obrikäit het beschlosse, d Stell nid wider dur en Aasässige z bsetze und wenn s doch wider emol e Hiirichdig oder Körperstroofe gääb, wurd mä e Scharfrichder vo uswärts hoole. Si het mit em Jakob Mengis us Frick e Verdraag abgschlosse und dä erst im Joor 1850 kündet.

Dr Peter Mengis het noch dr Demission d Dienstwoonig vo de Baasler Scharfrichder uf em Koolebärg verloo und isch in d Elisabethe züüglet. Er het as Dierarzt afo schaffe und isch 1824 Brueder in dr Zumft zu Gardner worde.

S Amt vom Hänker noch dr Demission vom Peter Mengis

Vo denn aa het Baasel kä äigene Scharfrichder me gha, het dr Hänkersboste autgsoorsd und mit em Scharfrichder Jakob Mengis vo Frick e Verdraag abgschlosse. S Waasemäisteramt, wo bis 1838 Däil vo de Ufgoobe vom Hänker gsi isch, isch denn vom Scharfrichderamt drennt und sälbständig gfüert worde, isch aber uf em Koolebärg bliibe. Am 9. Merz 1850 isch dr Verdraag mit em Fricker Scharfrichder ufglööst worde und s Waasemäisteramt isch an d Häägehäimerstrooss züüglet, wo hüte d Nummere 139 isch. S alte Hänkershuus uf em Koolebärg isch abgrisse und 1857 dur d Lienert-Mäitlischuel ersetzt worde.

Litratur

• «Gesetz betreffend Organisation der Wasenmeisterstelle» vom 7. August 1838 in Sammlung der Gesetze und Beschlüsse wie auch der Polizeiverordnungen, welche für den Kanton Basel-Stadt erlassen worden sind, 2. Band, Schwabe, 1839