Kopfabheini
Dr Kopfabheini isch e Baasler Richtstatt vom spoote Middelalter bis ins früeje 19. Joorhundert gsi. Er het sich dusse vor em Stäinedoor befunde, dört, wo hüte dr Parkblatz vom Zolli am Birsig isch.
| Dialäkt: Baseldütsch |
Gschicht
ändereWääred mä scho us em 13. Joorhundert wäiss, ass im Lysbüel vor em Spaaledoor e Galge gstande isch, wo mä im 14. Joorhundert uf e Gellert verläit het, isch dr Kopfabheini vor em Stäinedoor erst im 15. Joorhundert in Gebruuch cho und dört isch vor allem köpft worde. Das si jeedes Mol populääri Aaläss gsi und d Baasler Bürger si in Masse cho zueluege. Zimperlig isch mä drbii nid umgange. So het mä am Häiligoobe vom Joor 1474 achzää lombardischi Chriegsgfangeni verbrennt. Die letschti Hiirichdig z Baasel het doo am 4. August 1819 stattgfunde, wo dr Mäister Peter Mengis drei Stroosseröiber mit em Schwärt köpft het.
Au sümbolischi Hiirichdigunge het mä uf em Kopfabheini vollzooge. Wo d Baasler 1559 uusegfunde häi, ass dr Johann vo Brügge, wo zää Joor im Spiesshoof gläbt het und 1556 gstorbe isch, äigetlig dr Widerdöifer David Joris gsi isch, het mä si Liiche usgrabt und verbrennt.
Es het uf em Gländ e Podest ghaa, wo män emol druf köpft het, aber das isch scho im 17. Joorhundert nüm im Gebruuch gsi. Wo noch em Schwizer Buurechrieg 1653 säggs Baselbieter Buurefüerer uf em Kopfabheini köpft worde si, si e baar Schaulustigi uf em Podest oobe gstande zum besser chönne gsee.
Noch ere Exekuzion isch d Liiche vilmol bim Rabestäi nääbedraa verlocht worde.
D Gspängster
ändereBis ins 19. Joorhundert häi sich d Lüt verzelt, ass mä z Nacht bim Kopfabheini Liechter wurd gsee, wo d Gäister vo de Hiigrichdete sige, wo iiri abghaunige Chöpf wurde sueche und nid zur Rue chönni choo.
Kwelle
ändere- Wer war der Kopfabheini? uf altbasel.ch, abgrüeft am 9. Juli 2015
- Kopfabhaini uf basler-bauten.ch, abgrüeft am 9. Juli 2015
Koordinate: 47° 32′ 57″ N, 7° 34′ 58″ O; CH1903: 610852 / 266504