Kadesch

(Witergleitet vun Qadesch)

Kadesch (au Qadesch) isch ä Stadt im altertümlige Mittlere Oste gsi. Si isch im Weste vo Syrie am Orontesfluss gläge. Dr Herrscher vo Kadesch het zur Koalition vo de syrische und kanaanitische Brinze ghört, wo brobiert hai d Expansion vo Ägypte aazhalte.[1] In dr Ziit vo dr gröste Uusbreitig vom ägyptische Neue Riich het d Stadt zum Iiflussgebiet vo Ägypte ghört.

Politischi Charte vom Mittlere Oste zur Ziit vo dr Schlacht vo Kadesch
Uuschnitt us d Kampfszene vo dr Schlacht bi Kadesch im Ramesseum, wo mä d Stadtmuure gseht

Wi sich s Riich vo de Hethiter usbreitet het, isch Kadesch schliesslig an si gfalle. Us dere Ziit kennt mä dangg dä Amarna Brief drei vo de König vo Kadesh: dr Sutatara,[2] dr Etakkama (au Aitagama)[3] (öbbe 1340), Niqmadu, dr Sohn vom Etakkama[4]

Dr Pharao Seti I. isch uf siine militärische Kampagne bis noch Kadesch vorgstoosse, und het dört ä Siigerstela ufgstellt. D Stadt isch aber churz noch em Abzug vo de ägyptische Druppe widr an d Hethiter gfalle. In siim fümfte Regierigsjohr, öbbe 1273 vor dr Ziitwändi, isch dr Ramses II. mit vier Divisione gege Kadesch zoge. In dr Schlacht, wo westlig vo dr Stadt stattgfunde het, isch d Vorhuet vo de Ägypter under em Ramses sälber fast vernichtet worde, aber d Intervention vo Druppe us Amurru hai d Lag grettet. D Ägypter hai sich widr noch Süde zruggzoge und Kadesch isch in de Händ vo de Hethiter bliibe.[5]

Wie vili anderi Stedt in dr Levant am Afang vom 12. Johrhundert vor dr Ziitwändi isch Kadesch zerstört worde und us dr Gschicht verschwunde. Mä dänggt, as d Seevölker an ihrem Undergang gschuld siige.

Kadesch wird identifiziert mit em Tell Nebi Mend, wo öbbe 24 Kilometer südwestlig vo Homs lit(öbbe 34°35′N 36°31′E) in dr Nöchi vo Al Qusayr.[6]

Fuessnote ändere

  1. James Henry Breasted, Ancient Records of Egypt, Chicago 1906, Part Two, §§ 407ff.
  2. Revue biblique, 1966, S.487
  3. Gwendolyn Leick, Who's who in the Ancient Near East, Routledge 1999, S.8
  4. Leick, op.cit., S.123
  5. James Henry Breasted, Ancient Records of Egypt, Chicago: 1906, Part III; §§ 306 ff.
  6. Piotr Bienkowski, Alan Ralph Millard, Dictionary of the Ancient Near East, University of Pennsylvania Press 2000, S.163