Radio X (Basel)
| Allgemeini Informatione | |
| Empfang | drootloos, Kaabel, Internet |
| Gebiet | Agglo Baasel |
| Ersti Sändig | 19. April 1998 |
| Rächtsform | Stifdig |
| Programmtyp | Jugend- und Kultuursänder |
| Homepage | Website vom Radio X |
Radio X isch e nitkommerzielle Radiosänder, wo mä drootloos z Basel und in de nööchere Agglomerazioonsgmäinde uf 94,5 MHz und z Lieschdl und dr Umgääbig uf 93,6 MHz, in meerere Kabelnetz in dr Nordwestschwiz und via Läivstriim cha empfoo.
Dr regulääri Sändbedriib vom Radio X het am 19. April 1998 aagfange.[1] Sithäär bietet dr Radio X e 24-Stundebrogramm. Dr Sänder het meereri Redakzioone, wo äigeständig organisiert si, und mee as 200 eerenamtlige Mitarbäiter. En chliises Team wird zaalt und kümmeret sich um d Administrazioon, Akquisizioon, Praktikante, Projektbedröijig usw. Dr Sänder verstoot sich as Jugend- und Kultuursänder und isch as Stifdig organisiert. As äinzigs Radio in dr Regioon sändet s au in fremde Sprooche. Reegelmäässig loose jeede Daag öbbe 50'000 Lüt zue.[2]
S Radio X sändet e Brogramm mit mee as 4'000 Muusigdiddel us de verschidnigste Stilrichdige. Aktuelli Bidrääg, Veraastaltigskaländer, Kulturtipp, Spezialräije und s Bolitspeschl ergänze s dääglige Brogramm.
Früe am Oobe isch vom Määndig bis Fritig „d Wält z Basel“ z Gast uf Radio X: Die meersproochige Sändige si uf Änglisch, Italiänisch, Spanisch, Bortugiisisch, Türkisch, Kurdisch, Bosnisch, Kroatisch und Serbisch und biete Noochrichde, Muusig und Wüssenswärts. Vom nüüni z Oobe aa und am Wuchenänd scho früener wird Muusig gsändet. Die Muusigspeschels befasse sich mit Basler Interprete, mit Metal, Indie, Electronica, Drum'n'Bass, Reggae, Hip Hop, House und Trance.
S Radio X isch Mitgliid in dr Union vo de nit-kommerzorientierte Lokalradio (UNIKOM).[3]
Es git käi organisatorischi Verbindig zum Radiosänder mit em gliiche Naame z Frankfurt am Main, wo äänlig usgrichdet isch.
Weblingg
ändereFuessnoote
ändere- ↑ Radio X: über uns. Archiviert vom Original am 12. März 2012; abgruefen am 15. Dezember 2012.
- ↑ Radio X: Sponsoring. Archiviert vom Original am 12. März 2012; abgruefen am 15. Dezember 2012.
- ↑ Radio X: Organisation. Archiviert vom Original am 12. März 2012; abgruefen am 15. Dezember 2012.
|
Dä Artikel basiert uff ere fräie Übersetzig vum Artikel „Radio_X_(Basel)“ vu de dütsche Wikipedia. E Liste vu de Autore un Versione isch do z finde. |