Dr Räbhuusbrunne z Baasel

Koordinate: 47° 33′ 34,9″ N, 7° 35′ 47,8″ O; CH1903: 611891 / 267676

Dr Räbhuusbrunne vor em Restorant «Zum Räbhuus»
Dialäkt: Baseldütsch

Dr Räbhuusbrunne befindet sich an dr Riechedoorstrooss im Chläibaasel. Er stoot sit 1915 under Dänggmolschutz und isch äins vo de Baasler Kulturgüeter, wo für d Region vo Bedütig si.

Beschriibig ändere

Dr Brunnedroog isch achteggig. Us em Brunnestogg chömme zwäi Brunnerööre. Uf em undere Däil vo dr Süüle oobe druf het s vier Nische mit Fraue, wo Muusig mache. Drei het mä as d Muuse Erato, Euterpe und Terpsichore identifiziert. Bi dr vierte isch mä nid sicher. Drüber het s Figuure, wo hüügerle und zooberst hoggt e Löi uf eme kwadratische Soggel und hebt s Wabbe vo dr Gsellschaft zum Räbhuus in de Pfoote, und vo doo het dr Brunne si Naame.

Gschicht ändere

Dr Brunne stoot erst sit 1863 an dr Riechestrooss. Dr Droog isch vom Urs Bargetzi (1794-1865) z Soledurn gmacht worde. Mä nimmt aa, ass d Süüle uf em Brunnestogg vom Grämperbrunne stammt, wo bis 1855 vor em Huus an dr Grifegass 4 gstande isch. Im Joor 1883 het mä d Statue vom Löi, wo oobe uf dr Süüle gstande isch und in sine Pfoote s Wabbe vo Baasel ghebt het, in s Historische Museum brocht und dr Eugen Dock het e Kopii us Sandstäi gmacht. Scho 1900 het dr Jean Hym e nöiji Statue müesse haue, wil Bsoffnigi uf die alti Kopii uufeklätteret si und sä kabuttgmacht häi. Wo au im Hym sini 1968 vo Wandale zerstöört worde isch, het dr Ludwig Stocker 1972 e nöije Löi gmacht, wo hüügerlet und eso massiver isch as dr alti.

Kwelle ändere