Regiirigsbezirk Nordbade

De Regiirigsbezirk Nordbade isch en Regiirigsbezirk z Bade-Württebärg gsi, wo vo de Gründig vom Südweschtstaat im 1952i bis zu de Kreisreform im 1972i beschtande het. D Gränze sind noch die vom nördliche Teil vom alte Land Bade gsi. Ab em 1. Januar 1973 isch de Regiirigsbezirk Nordbade mit ere veränderte Gränzzihig zum Regiirigsbezirk Karlsrue worde.

Gschicht

Nach em Zwaite Wältchrieg isch de nördlich Teil vom Land Bade zämme mit em nördliche Württebärg zum Land Württebärg-Bade zämegfasst worde. Di Landchreis, wo vorher zu Bade ghört hei, sind als Landesbezirk Bade bezeichnet worde. Bi de Bildig vom Südweschtstaat im 1952 isch s noii Land in viir Regiirigsbezirk iiteilt worde, s Gebiet vom Landesbezirk Bade isch so zum Regiirigsbezirk Nordbade worde. S Regiirigspräsidium hät sin Sitz z Karlsrue gha. Mit de Chreisreform, wo uf de 1. Jannuar 1973 in Chraft gsetzt worde-n-isch, sin di Gränze vo de Landchreis und de Regiirgisbezirk noi zoge worde, ohni Rücksicht uf di alti Gränze zwüsche Bade und Württebärg. Us dem Grund het me au d Näme vo de Regiirigsbezirk gändret und so isch us em Regiirigsbezirk Nordbade de Regiirigsbezirk Karlsrue worde.

Verwaltigsgliderig

Charte vom Regiirigsbezirk Nordbade

Zum Regiirigsbezirk hei di folgende Schtadt- und Landchreis ghört:

Schtadtchreis

Heidelbärg, Karlsrue, Manne, Pforze

Landchreis

BR	Brusel
BCH	Buche
HD	Heidelbärg
KA	Karlsrue
MA	Manne
MOS	Mosbach
PF	Pforze
SNH	Sinse
TBB	Tauberbischofse