Regula Rytz

D Regula Rytz (* 2. März 1962 z Thun) isch e Schwiizer Politikerin. Si isch Nationalröötin und d Presidäntin vo der Grüene Partei vo der Schwiiz gsi.

d Regula Rytz (2019)

ihres Läbe und d Politik

D Regula Rytz isch d Dochter vomene Architekt und vonnere Musikerin, si het 1983 am Semer z Thun s Lehrerpatänt übercho und bis 1989 Schuel ggää. Derno het si a der Uni Bärn Gschicht, Soziology und Staatsrächt studiert und anne 1997 s Lizänziat gmacht.

Vo 1993 bis 1998 isch si die Politischi Sekretärin vom Grüene Bündnis Bärn gsi und 2001 isch si d Zentralsekretärin vom Schwiizerische Gwärkschaftsbund woorde. Vo 1994 bis 2005 isch si im Bärnische Grosse Root gsi und vo 2005 bis 2012 het si zu der Stadtregierig vo Bärn ghört.

2011 isch d Rytz füre Kanton Bärn i Nationalroot gwählt woorde, und 2015 grad wider. Anne 2019 het si füre Ständeroot kandidiert.

Am 21. April 2012 het me d Regula Rytz und d Adèle Thorens Goumaz zäme als Co-Presidäntinne vo der Grüene Partei vo der Schwiiz gewählt, und das isch bis 2016 eso ggange, wo d Rytz die einzegi Presidäntin vo der Partei worden isch.

D Rytz isch i der Schwiizer Öfentlechkeit und i de Medie guet präsänt zum d Aalige vo de Grüene go verträtte öppe wenn s ume Schutz vom Klima, um d Energypolitik oder ume Naturschutz und um soziali Frooge goot. Si macht im Vorstand vo der Alpeninitiative und i däm vom Lötschbärgkomitee und in andernen Organisazioone mit.

Bi de Wahle vom Schwiizer Bundesroot am 11. Dezämber 2019 isch d Rytz vo de Grüene als offizielli Kandidatin ufgstellt gsi; si isch aber vo der Vereinigte Bundesversamlig nit gwählt worde.

2022 isch si aus em Nationalroot zrüggträtte und neu Präsidäntin vo Helvetas worde.

Weblink

• d Website vo der Regula Rytz
• Noëmi Landolt: Die pragmatische Brückenbauerin. In: WOZ Die Wochenzeitung, 45/2011, 10. Novämber 2011