Rolf Rosendahl

Dr Rolf Rosendahl (* 17. Februar 1950 z Wyyl; † 15. April 2020) isch e dytsche Lehrer, Chinschtler un Musiker gsii.

Lääbe

Dr Rosendahl isch z Wyyl ufgwagse. No dr Schuel het er an dr Pedagogische Hochschuel Löörech Änglisch, Psichology un bolitischi Bildig studiert. Ab 1975 het er an dr Grund- un Hauptschuele z Zäll unterrichtet. Anne 2005 isch er as Konrätkter an d Buechebach-Grundschuel z Schännau gwägslet. Är het mitghulfe d Gmainschaftsschuel Oberes Wisedal ufzböue un het dert derno ne Großdail vu syne Unterrichtsstunde abghalte. Anne 2015 isch er in Ruestand gange, het aber no bis 2018 as Lehrer unterrichtet.

Syt dr 1980er Johr het er au as Chinschtler gschafft. Är het gmolt un zaichnet, unter anderem Landschaftsmotiv, Stillläbe, Akt in Aquarell un Acryl un derzue het er au Karikature zaichnet. Sy erschti Uusstellig het er anne 1987 z Untermünstertal zäme mit em Berthold Hünenberger ghaa. Iber d Johr het er verschideni Uustellige ghaa, vor allem in dr Gegnig, aber 2005 au z Berlin. Är het au ne Chunschtkaländer uusegee. An dr Volkshochschuel het er langi Johr Kirs gee, unter anderem in Aquarällmolerei un Zaichne.

Syt 1986 het mer dr Rosendahl in dr Region au gchännt as alemannische Musiker, wu mit dr Gitare alemannischi Lieder gsunge het. Sy erschte Ufdritt het er zäme mit em Bertold Hünenberger anne 1986 uf em „Schillinghof“ ghaa. Mit em Horst Kahl het er anne 2002 zäme s Duo Wunderfitz bildet, wu in dr Region mit alemannische Lieder ufdrätte isch. Si hän aigeni Lieder gsunge un derzue Anekdote un Gschichte uf Alemannisch verzellt un hän au zäme zwoo CD mit alemannische Lieder uusegee. Ab 2006 hän si zäme mit em Dieter Schwarzwälder e Trio bildet. Noch em Uusstiig vum Kahl 2016 hän dr Rosendahl un dr Schwarzwälder no as Duo „Zwei Wunderfitze“ wytergmacht.

Syt 2013 isch dr Rosendahl aktiv Mitglid vu dr Malteser-Ortsgruppe Wisedal z Schopfe gsii, ab 2018 isch er Ortsbeufdraite gsii.

Dr Rosendahl isch ghyrote gsii un het zletscht mit syre Frau Beatrice z Schännau gwohnt. Är isch am 15. April 2020 im Alter vu 70 Johr an dr Folge vun ere Chranket gstorbe.

Diskografy

• Wunderfitz:Chumm mr göhn go träume. CD 2003
• Wunderfitz:Gruusig schön. CD 2005

Weblink

• Trauer um den Wiesentäler Malteser-Chef Rolf Rosendahl, Badische Zeitung, 20. April 2020
• Schönau Pädagoge mit künstlerischer Ader, Markgräfler Tagblatt, 20. April 2020
• Das Schulleben mitgeprägt, Markgräfler Tagblatt, 22. Juli 2015