Rudolf Wintermantel

Dr Rudolf Wintermantel (* 31. Mai 1877 z Sanderge; † 18. Juni 1935 au dert) isch e dytsche Wyyhändler un Haimetdichter gsii.

Lääbe

Syt Vater isch dr domolig Burgermaischter un Boschthalter Jakob Wintermantel gsii. Gschafft het dr Rudolf as Fuerunternämer un Wyyhändler. Är het s Unternäme zäme mit sym Brueder vum Vater ibernuu.

Dr Rudolf het scho ase jung aafange dichte. Mit 22 het er sy erschte Band mit alemannische Gedicht vereffetligt, „Vor des Schwarzwalds Höhen“ (1899). Sy zweet Gedichtband „Heimat“ vu 1905 isch e große Erfolg wore, syterhär het mer en au iberregional gchännt. Insgsamt het er rund 200 Mundartgedicht verfasst.

Är het s Gfiel ghaa het, ass mit dr Modärni all mee alti Bryych verlore gehen. Wäge däm het er Volkssprich un Värs im Sandegemer gsammlet un anne 1900 in dr Zytschrift „Hochdeutsche Mundarten“ publiziert. Anne 1907 het er zäme mit andere z St. Georgen e Draachteverain grindet. Bis churz vor sym Dod isch er au Vorsitzer vu däm Verain gsii.

Är het rund 30 Theaterstuck im Dialäkt gschribe, sy erscht greßer Stuck isch „Vor der Hochzeit“ 1907 gsii. Mit em „Drama vum Galgenbauer“ vu 1908 het er si au an e schwirig Thema gmacht. Uruffierig isch e so ne große Erfolg gsii, ass s Stuck zwai Mol widerholt woren isch.

Är isch langi Zyt Mitglid vum Sandergemer Gmairot gsii. Derzue isch er Vorsitzer vum Främdeverchehrsverain gsii, Mitglid im Vorstand vum Schwarzwaldverain un vu dr Läsegsellschaft un Ehremitglid bi dr Freiwillige Fyyrwehr. Är het au zäme mit andere s Haimetmuseum initiiert.

Im Johr 1935 isch er in syre Haimetstadt im Alter vu 58 Johr noch ere schwäre Chranket gstorbe.

Wärch

Von des Schwarzwald's Höhen. Gedichte in alemannischer Mundart. Lorenz und Waetzel, Freiburg i. Br. 1899
Heimat. Gedichte in Schwarzwälder Mundart. 2. Sammlung. Eigenverlag, St. Georgen 1905
Gereimte Volkssprüche gesammelt in und um St. Georgen im Schwarzwald von Rudolf Wintermantel. In: Zeitschrift für hochdeutsche Mundarten. 1. Bd. (1900), S. 347-351

Rund 30 Theaterstuck, z. B. „Courage“, „De ledig Bua“ „Drama vum Galgenbauer“, „Vor der Hochzeit“

Literatur

Jochen Schultheiß: Hüter heimischer Kultur und Mundart. Der St. Georgener Rudolf Wintermantel hinterließ rund 200 Gedichte und 30 Theaterstücke. In: Schwarzwald-Baar-Kreis: Almanach. - 24. 2000. - S. 338-339
Alemannische Mundartdichter: Karl Benner, Maurus Beurle, August Ganther, Hans M. Grüninger, Paul Körber, Otto Raupp, Paul Sättele, Hermann Vortisch, Rudolf Wintermantel. In: Mein Heimatland. Badische Blätter für Volkskunde, ländliche Wohlfahrtspflege, Denkmal-, Heimat- und Naturschutz, Familienforschung. Freiburg, Br. - Bd. 13 (1926), S. 103 - 109

Weblink

Wintermantel, Rudolf uf LEO-BW