Rundturm

E Runddurm isch e Durm, won e runde Grundriss het. Er cha frei stoo oder Däil vom ene gröössere Baukomplex si.

Rundturm: dr Bärgfriid vo dr Burg Fröhlichsdurm z Mals

Bothwell Castle in Groossbritannie. Mä gseet dütlig dr rundi Durm uf dr lingge Site

E modärne Runddurm as Elimänt vo dr Gstaltig bi dr Kurt-Schumacher-Kasärne z Hannover

Ufbau, Form und Wirkig

D Form cha us esthetische oder us funktionelle Gründe eso gwehlt si. So si bi Befestigungsaalaage eggigi Dürm meh und meh von de Runddürm verdrängt worde wo d Kanoone ufchoo si, wil e Runddurm, wenn en e Kanoonechuugele vo dr Site drifft, weniger stark beschädigt wird. Hüfig si dr Donjon oder dr Bärgfriid uf ere Burg as Runddurm baut worde. Im Allgemäine si si Weeraalaage und Rückzugsort vo dr Burgbesatzig im Fall von ere Belaagerig gsi. In mängge Burge isch in ene aber au d Woonig vom Burgherr gsi (Woondurm). E sonigs Bischbil si d Burg Bonaguil und d Burg Coucy z Frankriich oder Bothwell Castle in Groossbritannie. Runddürm het mä au as Däil vo Stadtbefestigunge und Ringmuure baut. Si si Eggpünkt vo dr Verdeidigung gsi oder häi häikli Pünkt beschützt wie öbbe s Door. Für das häi si hüfig Weergäng und Weererker ghaa.

Litratur

• Chris Gravett: Atlas der Burgen. Tosaverlag, Wien 2001, ISBN 3-85492-470-4.

Dä Artikel basiert uff ere fräie Übersetzig vum Artikel „Rundturm“ vu de dütsche Wikipedia. E Liste vu de Autore un Versione isch do z finde.