Schuel für Gstaltig Baasel

Schuel für Gstaltig Baasel
Gründig	1796
Drägerschaft	Erziehigsdepartemänt Kanton Baasel-Stadt
Ort	Baasel, Schwiz
Diräkter	Roger Bischofberger
Studänt*ene	1300
Mitarbeiter*ne	130 (drvo 100 Leerer)
Website	www.sfgbasel.ch

D Schuel für Gstaltig Baasel (SfG Baasel) isch e Kompetänzzentrum für d Bruefsusbildig vo de gestalterische und künstlerische Brüef, wo wit über d Gränze vo dr Region bekannt isch. Si bietet Vollzitleergäng aa und Klasse wo mä cha nee, wemm mä scho im Bruef schafft. Si vermiddlet Vor-, Grund- und Witerbildig so dass dr Schüeler uf em komplexe Arbetsmäärt erfolgriich cha gstalterisch schaffe. Si stoot an dr Vogelsangstrooss 15 uf em Land vom ehemoolige Landguet Sandgruebe. En Ableeger vo dr Schuel isch d Lyss Schuel für Gstaltig an dr Spaalevorstadt 2.

Dialäkt: Baseldütsch

D Leerchreft chömme us de Beriich Gstaltig, Kunst und Wüsseschaft. D Usbildig nutzt modärni technischi Möglihkäite und nimmt Bezuug uf Trends in dr Gstaltig, und förderet die intellektuelle und handwärklige Fähigkäite. Zum Grundkonzept vo dr Schuel ghöört d Verbindig vo Theorii mit Wüsse, wo uf d Aawändig orientiert isch, und dr Bruefspraxis.

Gschicht

1796 isch e Zäiche- und Modellierschuel für jungi Handwärker gründet worde, und dr Kanton het sä 1887 als die kunstgwärbligi Abdäilig vo dr Allgemäine Gwärbschuel übernoo, won er denn gründet het und won e Zitli im Falkestäinerhoof dehäi gsi isch. Dere Gwärbschuel isch e Museum aagschlosse gsi, wo 1961 äigeständig worden isch, aber 1996 vom Staat us Spaargründ zuedoo worden isch.

D Kunstgwärbschuel mit em Gwärbmuseum in dr Spaalevorstadt bis 1961, denn isch s Museum für Gstaltig iine choo, wo 1996 zuedoo worde isch. Sit denn ghöört s wider dr Schuel für Gstaltig.

D Schuel, denn no d „Kunstgwärbschuel“, isch 1961 an d Vogelsangstrooss bim Baadische Baanhoof züüglet und iiri Entwicklig in de 1960er und 1970er Joor isch vo meerere iiflussriiche Leerchreft brägt worde: dr Emil Ruder, Tüpograaf und Diräkter het d Fachklass für Buechdruck gründet, dr Armin Hofmann isch Läiter vo dr Fachklass für Grafik gsi und het d Witerbildigsklass für Grafik ufdoo und dr Wolfgang Weingart het as Tüpograaf dr Fachberiich Tüpografii usbaut.

1980 het die kunstgwärbligi Abdäilig vo dr Allgemäine Gwärbschuel dr hütig Naame Schuel für Gstaltig überchoo.

Sit 1996 isch d Lyss Schuel für Gstaltig im ehemoolige Museum für Gstaltig an dr Spaalevorstadt 2 mit dr Baasler Blakaatsammlig Däil vo dr Schuel.

1999 isch d Fachhoochschuel Nordwestschwiz gründet worde, meereri Bildigsgäng si in sä integriert und restrukturiert worde, dass si de öiropäische Aaforderige entsproche häi.

D Schuel für Gstaltig git immer no d Vorkürs, d Aagebot vo dr Grundbildig und dr Witerbildig und isch hüte e Bruefsfachschuel uf dr Sekundaarstuefe II. Si isch hüte äigeständig und isch immer no in de Geböid an dr Vogelsangstrooss dehäi, wo dr Hermann Baur 1961 baut het. Si het dört Ustelligsrüüm für iiri Brojekt, en öffentligi Fachbibliothek und d Baasler Blakaatsammlig.

Bildigsaagebot

Vorkurs: Vollzit und au näben em Bruef. Grundlaag für gstalterischi Bruefsleere und Vorberäitig uf e Fachhoochschuelstudium.

Fachklasse für Grafik: Vollzit. Bruefligi Grundbildig mit integrierter Bruefsmaturitäät.

Fachunderricht für gstalterischi Bruefsleere: Däilzit. Drucktechnologe, Goldschmiid, Grafiker, Polydesäiner 3D, Polygraafe.

Witerbildig Textildesäin: Vollzit. Brofessionelli Verdiefig mit Schweerpunkt Gstaltig.

Witerbildig Tüpografii & Grafik: näben em Bruef. Vorberäitig uf Brüefige vo dr äidgenössische hööchere Bruefsbildig

Witerbildig Gstaltig und Kunst: Öffentligi Kürs underdags und z Oobe.

Weblingg

47.5634287.605435Koordinate: 47° 33′ 48,3″ N, 7° 36′ 19,6″ O; CH1903: 612554 / 268093

Dä Artikel basiert uff ere fräie Übersetzig vum Artikel „Schule_für_Gestaltung_Basel“ vu de dütsche Wikipedia. E Liste vu de Autore un Versione isch do z finde.