Schwarzwälder Kirsch

Schwarzwälder Kirsch isch a deitscha Farbfilmkomeede vom Regisseur Geza von Bolvary aus-em Johr 1958. D Ennaufnahma send en de UFA-Studios z Berlin-Tempelhof dreht worra on-d Ussaufnahma em Schwarzwald. S erscht Mol ens Kino komma isch der Film am 1. Auguscht 1958.

Filmdate
Originaltitel	Schwarzwälder Kirsch
Produktionsland	Deutschland
Originalsprooch	Deitsch
Erschiinigsjoor	1958
Lengi	90 Minute
Altersfreigoob	FSK 12
Stab
Regie	Geza von Bolvary
Dräibuech	Gustav Kampendonk
Produktion	Kurt Ulrich
Muusig	Lotar Olias
Kamera	Georg Bruckbauer
Schnitt	Ingrid Wacker
Bsetzig
D Marianne Hold als Angela Weschtmann Dr Dietmar Schönherr als Peter Benrath Dr Boy Gobert als Freddy Weller D Edith Hancke als Jedde Palm Dr Wolfgang Neuss als Egon Dr Wolfgang Müller als Oddo Dr Willy Fritsch als Arthur Aldaberg Dr Willy Reichert als Wachtmoischtr Reischle D Helen Vita als Lorle Dr Franz-Otto Krüger als Bolezeidirektr Dr Willy Rösner als Gaschtwirt ond Birgrmoischtr Dr Kurt Zehe als Hodelôôgstelltr Dr Rolf Pinegger als Hodellehrleng Hansl Dr Gerd Frickhöffer als Direktr Krone Sonscht noh a baar Leit en kloinre Rolla

Dialäkt: Schwäbisch

Handlong

Kaum hot d Angela Weschtmann ihr Priafong a dr Musikhochschual mit ra Beschtnot bschdanda, macht se sich glei uf, om da Opreddadirektr Krone om-a Engagement zu bidda. Der abr hot grad koi Zeit fir des Mädle ond lôôt se em Vorzemmr warda. Dr Krone hot nemlich Bsuach vom Kombonischda Peter Benrath ond deam seim Freind ond Tegschdr Freddy Weller. Die zwoi hend em Krone vor a baar Johr an graußa Geldseaga bschert mit ihrer Opredde Das Mädchen vom Titisee. Jetzt geit’r en an nuia Uftrag, weil’r dean Erfolg gern wiidrhola dät. Au d Eiwohnr vom (figdiva) Schwarzwaldstädtle Glicksdal hend seither meh Turischda griagt, weil des Sengschbiil hauptsächlich e deam Ort schbiilt. Zom Dank wellet se em Peter Benrath en seim Beisei a Denkmal setza.

Durch a saudomma Vorwexlong heert d Angela Westmann em Vorzemmr, wia se vom Kombonischda Benrath beim Direktr Krone schleacht gmacht wuud, obwohl se der doch ibrhaupt et kennt. Abr em Krone langt, was’r gheert hot. Er siiht koin Grond, des Mädle zo empfanga ond lôôt se wegschigga. D Jedde, wo ihr Freindin Angela begleidet, ischt außr sich. Se hot grad noh mitgriagt, dass sich dia zwoi Manna noch Glicksdal ufgmacht hend. Drom fordret se d Angela uf, deane Kerle nochzfahret ond deam selbschtherrlicha Benrath grendlich d Moinong zo geiga.

S Ziil Glicksdal vor Auga hend nomol zwoi Freind: d Wandrmusikanda Egon ond Oddo. Se hend scho Blôôsa a de Fiaß, dô entdecket se uf oimol a vorlasses Audole am Waldrand. Des nemmet se glei en Bschlag ond fahret zom nägschda Bââhof. Deet ondrhaldet se d Leit mit ihrem Gsang ond hoffet uf graußziigige Schbenda. Uf oimol kommt dr Zug, wo au dr Benrath ond dr Wellr gnomma hend. Dia Boide hend uf dr Fahrt scho arg diaf en-na Flasch Schwarzwälder Kirsch neigugged ond wondret sich dribr, dass dussa ebbr an Benrath-Schlagr trällret. Hemdsermelig steiget se aus, om dia Musikanda näher ôôgugga zo kenna. Dô daucht ganz bletzlich dr prellde Audobsitzr mit em Wachtmoischtr Reischle uf, om dia Dagdiab hendr Schloss ond Riigl zo brenga. Wia dr Zug grad wiidr ôôfehrt, schbrenget dr Egon ond dr Oddo e dr letzschda Sekond noh uf ond de andre zwoi hend’s Nochseha. Fir da Reischle geit’s koin Zweifl, dass dia des Audo klaut han miaßet. Se werdet vorhafdet ond vorlaifig ens Schbritzaheisle neigschberrt. Deet vortreibet se ihr Zeit dô drmit, dass-se glei ôôfanget, a deam nuia Werk fir da Direktr Krone romzobäschtla. Em Lauf dr Zeit leeret se a ganza Flasch Kirschwässrle, ond nô schbrudlet ihre Ideea wia vo alloi. So entstoht des nuie Liad vom Schwarzwälder Kirsch.

Zom Glick fir dia zwoi Gfangene isch des Schbritzaheisle koi Hochsichrheitstrakt. Drom hend se a leichts Schbiil, am nägschda Morga abzohaua. Weil se abr bloß e dr Ondrwesch send – dr Reischle hot nemlich nôch ihrer Vorhafdong ihre Hosa beschlagnahmt, – „leihet“ se sich „nuie“ Kloidr vo a baar Voglschoicha. E dera Kluft werret se bald vo zwoi jonga Dama, wo mit ihrem Audole vorbeikommet, am Strôßarand ufglada. Bei deane Frauazemmr handlet’s sich nadiirlich om d Angela on-d Jedde; abr ma kennt sich jô emmr no et.

Kurz vor Glicksdal steiget dia zwoi Ôôhaltr aus. E dr Stadt selbr quardiiret sich d Angela on-d Jedde e dr Tanne ei. E deam Hotel loschiiret au d Wandrmuskanda Egon ond Oddo. Wia dia nemlich mit-em Zug en Glicksdal eitroffa send, send se vo dr Birgrschaft fir da Peter Benrath ond da Freddy Weller ghalda ond stirmisch gfeiret worra. Bald komm-d Angela mit-em Egon ens Gschbräch ond ischt ganz baff, wia-ra der vrschbricht, dass’r-ra a Engagement vorschaffa kennt.

Enzwischa isch dr richdich Peter mit seim Freind uf-em Hof vo seim Onkl Arthur Aldaberg ôôkomma, wo sich dia zwoi zerscht amol bessre Klamodda zuleget, bevor se sich beim Peter-Benrath-Festival bligga lend. Zo deane ihrer Ibrraschong kommet am Ôbad d Angela on-d Jedde uf Bsuach. Dr Aldaberg hot dia Mädla zuafellig kennaglernt ond dô drbei glei a Aug uf d Angela gworfa. Dia Fraua send abr genauso ibrrascht, e deam Haus uf ihre Ôôhaldr zo treffa, kommet abr emmr no et drhentr, wer dia zwoi en Wirklichkeit send. Doch bei ma Ausridd erfehrt dr Peter, wer d Angela ischt ond was’r dera Schlemms doa han soll. Em Nu kommet seine Gedangga vo deam Mädle nemme laus.

Z Glicksdal herrscht Volksfescht-Stemmong, weil heit dui Ehrong vom Peter Benrath staddfenda soll. Uf dr Tribihne sitzt dr Egon neabem Birgrmoischtr ond wenkt em vorbeilaufenda Feschdzug zua. Derweil hend sich dr Peter ond dr Freddy ondrs Publikom gmischt ond wardet ab, wia sich dui Sach so entwicklet. Schliaßlich fellt dr Vorhang vom Denkmal: Ma siiht an graußa Stoi mit ma Relief vo ma Kopf, wo ebbr andersch zeigt wia da Egon. Der Schwendl lôôt sich jetzt nemme halda; abr s Publikom hot trotzdem sein Schbass a dera Vorfihrong, ond Angela on-d Jedde drauet ihre Auga et, wia dô uf oimol dr Peter ond dr Freddy uf-d Tribiine kleddret. Abr au dia zwoi hend fir dean Stroich vo de Hochstablr bloß a Schmonzla ibrig ond kennet deane Kerle et bees sei. Em Publikom saget se sogar, dui Deischong wär als Schbässle vo-nen plant gwäa.

Jetzt endlich kô des Peter-Benrath-Festival losganga. Zerscht sengt d Angela en ra Schwarzwäldr Tracht mit ma rauda Bollahuat s Liad vom Schwarzwälder Kirsch, ond nochher folgt als Heheponkt a Revue mit dr Musik vom Jubilar. Am Schluss vo deam Film geit’s zwoi glickliche Pärla: D Angela ond dr Peter – d Jedde ond dr Freddy.

Musig

D Musig zo deam Film hot dr Lotar Olias (1913–1990) gschriiba, oinr vo de erfolgreichschde deitsche Schlagr- ond Musicalkombonischda vo de 50er- ond 60er-Johr vom 20. Johrhondert. Als Tekschtr isch-em dr genauso erfolgreiche Peter Moesser (1915–1989) zor Seit gstanda. Dr Kehrreim vo dr Titlmelodie goht so:

Schwarzwälder Kirsch,
Schwarzwälder Kirsch,
Und ein Schwarzwälder Mädel dazu,
Wie du – ja,
Wie du – ja,
Dann lacht mir das Glück immerzu!
(De letschde drei Zeila werret wiidrholt.)

Kritik

• S Lexikon des internationalen Films (Bd. 7 en dr Ausgab vo 1988) moint, es dät sich om a mäßigs Luschtschbiil em Folklorelook mit Schlagr- ond Volksmusig handla.
• D Fernsehzeitschrift Gong (Nr. 19/2010, S. 59) moint, der Film wär a kurzweiliga Ondrhaldong im Stil vo dr Zeit ond geit em viir vo sechs megliche Ponkt, was guad hoißt.
• S Fernsehmagazin rtv (Nr. 19/2010, S. 16) weerdet dean Film mit zwoi vo drei megliche Sternla, was durchschnittlich bedeidet.

Litradur

S Programm zom Film (Verlag Das neue Filmprogramm GmbH Mannheim, Nr. 3981)

Weblink

• Schwarzwälder Kirsch in dr Internet Movie Database
• Schwarzwälder Kirsch bei cinema.de (Site cha nüme abgrüeft wärde; Suche im Webarchiv)[1] [2] Vorlage:Toter Link/www.cinema.de
• Schwarzwälder Kirsch bei moviepilot.de