Siegfried Kallenberg

Dialäkt: Schwäbisch

Dr Siegfried Garibaldi Kallenberg, wia-nr mit-em ganza Nama ghoißa hôt (* 3. Novembr 1867 z Schachen bei Lindau – heitzodag an Ortsdoil vo sellra Stadt em boirischa Regiirongsbezirk Schwaben –, † 9. Februar 1944 en Mincha) ischt a deitscher Kombonischt ond Hochschuallehrer gwäa.

Aus seim Leaba

Dr Siegfried Kallenberg ischt am 3. Novembr 1867 z Schachen am Bodasee uf d Welt komma. Nôch-em Abi hôt’r d Lehr vo dr Kombosizioo studiirt, zerscht an dr Musikhochschual vo Stuegert ond hendrher an dera vo Mincha. Wia-nr dô drmit ferdich gwäa ischt, hôt’r am Konservadoriom vo Stettin a Stell als Theoriilehrer kriagt. Em Jôhr 1892 isch’r dr Rektor vo sellra Eirichdong worra. S gleiche Amt hôt’r schbätr noh en Keenigsberg ond en Hannover ausgiabt. 1910 schliaßlich hôt dr Kallenberg sei Hochschualamt an da Nagl ghengt, ischt nôch Mincha omzoga ond hôt deet bloß noh fir seine Kombosiziona gleabt: an Haufa Kammermusik, etliche grauße Chorwerk, rond 300 Liadr, drei Opra, zwoi Pandomima, zwoi Sinfonía ond a Requiem. Zo seira Zeit hôt’r zo-ra Grubbe vo Kombonischda gheert, wo an strenga expressionischdischa Stil pfleagt hend.

D Freind ond Bewondrer vo deam Kinschtler hend em Jôhr 1921 z Mincha a Siegfried-Kallenberg-Gesellschaft grendet. Dô drmit hend-se da Zweck vrfolgt, seine Werk ama greeßra Personakreis bekanntzomacha; abr älle Bemihonga vo sellra Gsellschaft hend koin wesentlicha Erfolg zeigt. Heitzodag isch dr Kallenberg weitgehend vrgessa.

A kloina Auswahl vo seine Werk

• Sun Liao, a Opr
• Das goldene Tor, a Opr
• Requiem, a grauß geischtlichs Werk fir Solischda ond an Chor
• 90. Psalm, a grauß Chorwerk

Quella

• Illustriertes Musiklexikon, rausgäa vom Hermann Abert, Verlag J. Engelhorns Nachf., Stuttgart, 1927
• Friedrich Herzfeld: Das Lexikon der Musik, Verlag Ullstein GmbH, Frankfurt am Main – Berlin – Wien (1976)