Sivananda

De Swami Sivananda Saraswati (skt. Svāmī Śivānanda Sarasvatī; * 8. September 1887 z Pattamadai, Tamil Nadu, Indie, † 14. Juli 1963 z Rishikesh, Indie) isch en südindische Arzt, Yogalehrer und spirituelle Maister gsii.

s Lebe

De Sivananda isch am 8. September 1887 as jüngste vo drai Söö vom Vengu Iyer (sprich: Aier) und vo de Parvati Ammal uf d Welt choo und het de Name Kuppuswamy öberchoo und stammt usere orthodoxe südindische Brahmanefamili mit birüemte Vorfaare. Scho as Chind isch er dör sini starchi Nöchsteliebi uufgfalle. Er het denn z Tanjavur (Tamil Nadu, Indie) a de Medical School Medizin studiert und het as üsserst fliissige und hilfsberaite Student vill Understützig öberchoo. Au het er e medizinischi Zitschrift mitem Name Ambrosia usegee. Obwoll er usere strenge Brahmanefamilie cho isch, het er sich wenig um d Chasteregle gchümmeret und sich au um Lüüt vo de undere Chaste persönlich gwidmet.

Churz nochem Tod vo sim Vatter isch de Kuppuswamy ane 1913 uf Malaysia ggange und het glii chöne d Laitig vomene chliine Spitool vonere Gummiplantage öbernee. Obwoll er vill Erfolg gha het und au zu Geld cho isch, het er sich 1923 entschide, ales uufzgee. Er isch mitem Schiff uf Chennai (Madras, Indie) zrugg und het den as Wandermönch e Pilgerrais undernoo. Noch merere Mönet isch er uf Rishikesh cho, emene chliine Pilgerort am Ganges am Südfuess vom Himalaya. Dai het er sin Guru (spirituelle Lehrer) Swami Visvananda Saraswati troffe und het underem Name Sivananda Saraswati d Initiation as Dashnami Sannyasi öberchoo. De Sivanada het denn inere chliine Hütte glebt und sich enere strenge Askese underzoge. Denebet het er a chranke Mönch und Askete medizinischi Hilf abotte. Spöter het er as Wandermönch vili indischi Pilgerort bsuecht.

Ane 1936 het de Sivananda d Divine Life Society ggründet und het sini erste Schüeler ghaa. Glii het sich us de chliine Gmainschaft z Rishikesh en bikannte Aschram bildet, wo schnell gwachsen isch. Um sinene Schüeler und Aahänger s Studium vo de hailige Schrifte z erliechtere, het er 1948 d Yoga-Vedanta Forest Academy gründet und drai Joor spööter d Yoga-Vedanta Forest Academy Press, um sini Schrifte z veröffetliche. As Arzt het er sich immer bsundrigs um die Chranke und Ärmste gchümmeret und 1957 isch s Sivananda Eye Hospital z Rishikesh offiziell uufggange.

De Sivananda isch em 14. Juli 1963 z Rishikesh gstorbe.

Werch und Lehr

de Swami Sivananda (Mitti) mit Schüeller, 1949

De Swami Sivananda het öber 200 Büecher usebrocht und denebet au Flugblätter vertailt und sinene Schüeler usserhalb vom Ashram und vo Indie Brief gschickt. Vo sim Elterehuus isch er en Hindu und sin Vatter isch en hochfromme Aahänger vom Shiva gsii. De Sivananda het sich bsundrigs mitem Vedanta usenandergsetzt und verschidnigi Yogarichtige zämegfüert, wel er all Aspekt vom Lebe för wichtig ghalte het, so de Karma-Yoga (Nöchsteliebi und Dienst a de Arme und Bidürftige), Bhakti-Yoga (Higoob a Gott), Jñana-Yoga (Studium vo de hailige Schrifte), Hatha-Yoga (Körperüebige), und Raja-Yoga (Bherrschig vom Gaist). De Swami Sivananda het sich nöd um d Chastezueghörigkait vo sinene Schüeler gchümmeret und er het au Fraue as Schüeler uufgnoo, so di Tütschi Swami Sivananda Radha (1911-1995), wo spöter z Kanada glebt het. De Sivananda het au anderi Religione gachtet und vo sinene christliche oder muslimische Schüeler nöd verlangt, as si eri Religio uufgend.

Schüeller

De Sivananda het meriri Schüeller ghaa, wo au im Weste birüemt wore sind. De Swami Omkarananda (1929-2000) het 1966 z Winterthur en Aschram ggründet, de Swami Vishnu-devananda (1927-1993) ghört zu de erste, wo de Yoga im Weste bikannt gmacht het. Witteri Schüeller sind de Swami Chidananda, de Swami Krishnananda und de Swami Satyananda. Au de Russ Boris Sacharow (1899-1959) und de Belgier André van Lysebeth (1919-2004) sind Schüeller vom Sivananda gsii.

Büecher

Swami Sivananda: Die Kraft der Gedanken; Mangalam Books. ISBN 3-922477-94-1
Swami Sivananda: Shrimad Bhagavad Gita, Erläuternder Text und Kommentar von Swami Sivananda; Mangalam Books. ISBN 3-922477-06-2
Swami Sivananda: Hatha-Yoga / Der sichere Weg zu guter Gesundheit, langem Leben und Erweckung der höheren Kräfte; Heinrich Schwab Verlag. ISBN 3-7964-0097-3
Swami Sivananda: Göttliche Erkenntnis; Mangalam Books. ISBN 3-922477-00-3
Swami Sivananda: Sadhana; Mangalam Books. ISBN 3-922477-07-0
Swami Sivananda: Autobiographie von Swami Sivananda; Bad Mainberg 1999. ISBN 3-931854-24-8

Literatur

Sivananda – ein moderner Heiliger. Erzählt und gesammelt von seinen engsten Schülern. Yoga Vidya Verlag. Horn-Bad Meinberg 2007, ISBN 3-931854-63-9