Omkarananda
De Swami Omkarananda Saraswati (* 25. Dezember 1929 z Hyderabad, Indie; † 4. Jänner 2000 z Lange bi Bregez, Österriich) isch en indische Sannyasi (Mönch) gsii und e Schüeler vom Swami Sivananda. Er isch de Gründer vom Divine Light Zentrum z Winterthur.
Lebe
ändereDe Omkarananda isch am 25. Dezember 1929 im indische Hyderabad uf d Welt cho und het de Name Hari Krishna öberchoo. Er het sini Eltere früe verlore und isch vo christliche Ordeschwöstere underrichtet wore und spöter uf s Islamia-College gange. Mit vierzeni het er e Vision vom Shirdi Sai Baba ghaa und isch mit sechzeni uf Rishikesh ggange und dai scho glii en enge Schüeler vom Swami Sivananda wore.
Ane 1965 isch de Omkarananda i d Schwiiz cho und het sich z Winterthur niderloo, woner ane 1966 s Divine Light Zentrum (DLZ) gründet het. Da Zentrum het guete Erfolg ghaa und namhafti Förderer und Schüeler gwune, isch aber au immer stärcher i s Schussfeld vo Kritike cho.
I de sibezger Joor isch s DLZ is Blickfeld vo de Öffetlichkait groote, well militanti Aahänger vom Omkarananda mit kriminelle Aktione versuecht hend gege iri Kritiker azgoo. Die hend im Oktober 1975 i zwee Bombeaschläg gipflet. Ai Bombe isch z Söizi bim Huus vom Regierigsroot Jakob Stucki deponiert wore und die ander bimene Winterthurer Rechtsawalt, doch sind baid Bombe nöd detoniert. De Omkarananda und e paar vo sinene Aahänger sind wege Mordversuech vor s Gricht cho und de Omkarananda isch ane 1979 zu 14 Joor Zuchthuus und 15 Joor Landesverwiis verurtailt wore.
Noch de Haft het sich de Omkarnanda z Lange bi Bregez niderloo, woner e zwaits Zentrum ggründet het und woner denn am 4. Jänner 2000 gstorbe isch.
s Bombeattentat
ändereDa Bombeattentat het i de Press höchi Welle ufgworfe und de Tagi het probiert nochezwiise, as d Zörcher Polizai zäme mit de belgische Polizai i da Attentat involviert gsii sai und s Material ade Attentäter gliferet hebi; drum saiet die Bombe onöd explodiert. De zueständig Polizaifunktionär isch zuedem spöter wegere andere Sach vom Dienst dispensiert wore. Zudem werd au bizwiiflet, wie wiit de Omkarananda i die Aktione involviert gsii sai und öb er öberhopt nebis devo gwüsst hebi. Aahänger vom Omkarananda redet au vomene Komplott vo de Kritiker am DLZ, doch isch ene bis hüt nöd glunge, s Urtail vo 1979 z revidiere.
Biographie
ändere- Vidyaprakashananda: An Eminent Avatara Purusha; Heinrich Schwab Verlag. ISBN 3796401880
Weblinks
ändere- Offizielli Siite vom Divine Light Zentrum, Winterthur
- Divine Light Zentrum, Winterthur
- Offizielli Siite vom Omkarananda Ashram, Indie
- Samlig vo de Entschaidige vom Schwizerische Bundesgricht 2002
- Samlig vo de Entschaidige vom Schwizerische Bundesgricht 2003
- NZZ 11. März 2006: "Swami Omkaranandas langer Schatten" (Site cha nüme abgrüeft wärde; Suche im Webarchiv)