St. Patrick’s Day

Dr St. Patrick’s Day (irisch Lá Fhéile Pádraig) isch dr Maandaag vum irische Bischof Patrick, wu waarschyns im 5. Joorhundert gläbt het un as eerschte chrischtlige Missionar z Irland giltet. Sy Gebuurts- un sy Doodesdaag waißt mer nit, s Daatum 17. Meerz fir dr Doodesdaag isch zum eerscht Mool im 7. Joorhundert gnännt woore. E Dail Hischtiooriker glaube, ass in dr Gstalt vum St. Patrick, wien er hite vereert wird, zmindescht zwoo Manne zämegflosse sin, näb em Patrick au no dr Missionar Palladius. Dr Patrick wird in dr kadoolische Chilche as Hailige vereert.

St. Patricks Day Parade, Dublin 2013

Di grien aagstraalt St Patrick Cathedral z Dublin, 2018

Dr Rhyyfall am St. Patrick’s Day 2017

Maandaag

Dr Maandaag vum hailige Patrick isch in dr reemisch-kadoolische Chilche un dr anglikanische Church of Ireland am 17. Meerz. Wel dr Hailig as Schutzpatron vu Irland giltet, isch s Fescht vum Hailige im irische Regionaalkaländer e Hoochfescht.

Dr 17. Meerz isch in dr Republik Irland, z Nordirland, im britische Iiberseebiet Montserrat un in dr kanaadische Brovinz Neifundland e gsetzlige Fyyrdig. Dr St. Patrick’s Day wird wältwyt vu Ire, irische Emigrante un allmee au vu Nit-Ire gfyyrt. Z Dublin un dr maischte andere irische Stedt mache grooßi Paraade un anderi Akzioone dr St. Patrick’s Day zue me bunte Volksfescht. Di greeschte Paraade git s hite z Dublin, z Minche, z New York, z Boston, z New Orleans, z Chicago, z Manchester un z Savannah. Au in dr britische Hauptstadt London git s all Joor e Paraad un e Feschtival.

Am 17. Meerz isch Grien d Faarb, wu iiberaall voorheerscht bi dr Ire in aller Wält. In e Dail Stedt, z. B. Chicago, wääre St. Patrick’s Day sogar d Fliss grien gfäärbt. Au in dr Schwyz git mittlerwyli s Akzioone am St. Patrick’s Day, zem Byschypel wiird dr Rhyyfall bi Schafuuse grien aagstraalt.

Weblink

 Commons: St. Patrick’s Day – Sammlig vo Multimediadateie

• Dublin’s St. Patrick’s Festival uf stpatricksday.ie
• St. Patricks Day in Amerika uf zeitgeistusa.de
• St. Patrick's Day uf religionfacts.com (englisch)

Fueßnote

Dä Artikel basiert uff ere fräie Übersetzig vu dere Version vum Artikel „St._Patrick’s_Day“ vu de dütsche Wikipedia. E Liste vu de Autore un Versione isch do z finde.