Stefanie Stroebele

Dialäkt: Schwäbisch

D Stefanie Ströbele (* 3. Juli 1964 z Stuegert) ischt a deitscha Schauschbiilere, Reschisseere, Autorin ond Tiirlehrere.

Aus ihrem Leaba

D Stefanie Stroebele kommt am 3. Juli 1964 als Dechterle vo-ma Techniker ond ara Schriftstellere z Stuegert uff d Welt. Uffwachsa duet-se abr en Bernhausa. Scho während ihrem Bsuech vom Eduard-Spranger-Gymnasium zeigt sich en dr Theader-AG dui graußa schauschbilerischa Begabong vo sellem Mädle. Drom hegt-se au bald da Wonsch, nôch dr Schuelausbildong au beruaflich Schauschbilere zo werda. Glei nôch-em Abidur schbricht-se als oina vo 800 Bewerberenna ond Berwerber z Stuegert an dr Hochschule für Musik und darstellende Kunst vor. Frei send abr bloß zäa Plätz, ond vo deane kriagt-se koin. Drom stellt-se zonägscht ihrn Beruefs-Wonsch, Schauschbiilere zo werra, a bissle zruck ond gôht nôch Mincha, om en sellra Stadt Germanischdik zo studiira. Neabaher nemmt-se abr noh an privada Schauschbiil-Ondrricht ond schbiilt kloinere Rolla am wenziga Ludwig-Thoma-Theater, wo grad amôl 40 Plätz fasst. Ihr Studiom an dr Ludwig-Maximilian-Universität beendet-se schließlich mit-ma Abschluss als Magischder. Mit deam Dokument ond ama Zertifikat vo dr Kinschtler-Vormiddlong kehrt-se zruck nôch Stuegert. Deet macht-se bald ihr Aufwardong beim Elert Bode, em Intendanda vom Boulevard-Theader Komödie im Marquardt, weil dr sell grad a Theaderstickle em schwäbischa Dialekt vorbereidet. D Stroebele kô da Bode ibrzeiga, dass-se s Schwäbisch perfekt beherrscht. Se wuud gnomma, ond vo jetzt ôô stôht dr sell Dialekt em Middelponkt vo ihrem Schaffa. Abr s Hochdeitsche vorlernt-se desweaga et. Em Jôhr 2012 kommt ihr erschder Roman raus: Die Wahrheit hat nur ein Gesicht, wo-se ondrem Pseidoniim Stella Brightley voreffentlicht.

Ama scheena Dag em Jôhr 2002 siht d Stefanie Stroebele bei-ma Schbaziirgang uff dr Stuegerter Karlshehe a Pärle mit-ma schwarz-weißa Collie. Se bleibt standa ond beobachdet ganz fasziniirt des Tiirle. Dô drbei fellt-ra auf, dass der Hond an riisiga Schbass am Lerna hôt. Jetzt entschliaßt-se sich, au so a Hondle ôôzoschaffa. Weil-se abr bei dr Erzihong vo so-ma Tiir koin Fehler macha will, schafft-se sich an Haufa Fachlitradur zom Durchackra ôô. Bsonders ôôschbrecha duet-se des Buach Die Kunst, mit dem Hund zu reden vo dr Vorhaldens-Biologin Gudrun Feltmann-von Schröder. Weil-ra der Stoff abr et ausreicht, absolviirt-se am Bayreuther Institut Feltmann-von Schröder noh a dreijähriga Ausbildong ond därf sich hendrher a Lizenzierte Tierlehrerin hoißa. Neaba dr Theader-Arbet isch des dr Stroebele ihr zwoids wirtschaftlichs Standboi.

D Stefanie Stroebele leabt mit ihrem Môô Armin Jung – au der ischt a Schauschbiiler, wo mr oft an de Stuegerter Schauschbiil-Bihna seha kôô – em Stuegerter Stadtdoil Degerloch.

A Auswahl vo ihre Werk

als Reschisseere

• Lottoglück vo dr Sabine Thiesler, 1999 en dr Komödie im Marquardt (KIM) z Stuegert
• Jessica kommt zurück vom Horst Pillau, 2000 en dr KIM
• Meister Eder und sein Pumuckel, a Theaderstickle fir Kender vo dr Ellis Kaut, 2002 en dr KIM
• Mondscheintarif vo dr Ildikó von Kürthy, 2006 em Theader-Schiff z Heilbronn
• Der letzte der feurigen Liebhaber vom Neil Simon, 2009 em Theader-Schiff z Stuegert-Bad Cannstatt
• Haie küsst man nicht, a Stick vo dr Stefanie Stroebele selber, 2009 em Theader-Schiff z Stuegert-Bad Cannstatt
• Altweiberfrühling vom Stefan Vögel, 2009 en dr KIM, fir dui Inszeniirong ischt-ra dr Publikumspreis zuaerkannt wôrra.
• Koi Leich ohne d Lilly vom Jack Popplewell, schwäbischa Fassong vo dr Reschisseere, 2010 en dr KIM
• Noch einmal verliebt vom Joe DiPietro, 2011 em Grenzlandtheater z Aacha
• Endlich alloi vom Lawrence Roman, schwäbischa Fassong vo dr Reschisseere, 2013 en dr KIM

als Schauschbiilere em Theader

• Sonny Boys vom Neil Simon, Roll: D Nichde
• Schlossplatz vom Manfred Zach, en deam Stick, wo z Stuegert em Alda Schauschbiilhaus sei Uruffihrong erleabt hôt, ischt-se glei en nei Rolla zo seha gwäa.
• Die Muschelsucher, a Stick nôch-em gleichnamiga Roman vo dr Rosamunde Pilcher, dô dren hôt-se d Nancy gschbiilt.
• Dr Entaklemmer, em Thadäus Troll sei oizigs Theaderstick, wo se als d Marianne zo seha gwäa ischt.
• Em William Shakespeare seira Kommede Viel Lärm um nichts hôt d Stefanie Stroebele bei de Burgfeschtschbiil z Mayen d Roll vo dr Hero vorkerpret.
• Gesegnetes Alter vom Curt Flatow, dô dren hôt-se an dr Neia Schaubihne z Mincha d Chrischda gschbiilt.
• Sherlock Holmes und die Kehrwoche des Todes vom Tobias Bungter. En dera Kommede hôt d Stefanie Stroebele et bloß mitgschbiilt (d Rolla vom Frailein Knöpfle ond vo dr Schauschbiilere Olga Eck), sondern des Theaderstick fir d Uruffihrong an der Stuegerter Komödie im Marquardt au en da schwäbischa Dialekt ibrsetzt.

als Autorin

• Die Wohnungssuche, a Heerschbiil, zom erschda Môl gsendet em Jôhr 1992 em Sidwescht-Funk (SWF) Bada-Bada
• Begegnung der besonderen Art, nomôl a Heerschbiil fir da SWF (1999)
• Über dem Honigmond, a Komeede, Uruffihrong 2000 em Kammertheader Karlsruha
• Wasserleichen, a Kriminal-Heerschbiil fir da Sidwescht-Rundfunk (SWR) (2007)
• Kennst du das Land, in dem die Töne blühn?, a Musik-Theaderstick, schbeziell gschriiba zom Jubileom vo dr Stuegerter Musikschuel em Jôhr 2007. Dô drfir ischt-se en sellem Jôhr mit-em Loddo-Musiktheaderpreis auszeichnet wôrra.
• Schmolke & Co., a Komeede, uruffgfihrt 2007 em Hamburger Ohnsorg-Theader
• Collier des Todes, a Kriminalheerschbiil fir da SWR (2008)
• Wie zerronnen, so gewonnen, a Komeede, uruffgfihrt em Jôhr 2013 beim Volkstheader Frankfurt am Main
• Selbst ist die Frau, a Komeede, zom erschda Môl ibr d Bihne ganga em April 2015 em Theader-Schiff z Stuegert-Bad Cannstatt

Quella

• Frank Buchmeier: Die will nicht nur spielen, a Porträä vo dr Stefanie Stroebele en dr Stuegerter Zeidong vom 17. Sebdember 2015, S. 28
• Lueg d Weblinks

Weblinks

• D privada Webseit vo dr Stefanie Stroebele
• A Porträä vo sellra Kinschtlere uff dr Webset vo de Stuegerter Schauschbiilbihna