Stiller Has

Stiller Has isch es Bärner Ensemble mit em Sänger Endo Anaconda. Si hei bärndütschi u öschtrychischi Texte. Musikalisch sy si vilsytig; ire Stil lat sech vilech am ehndschte mit de Wort vom Endo als eine Art helvetischer Bluesform la beschrybe.

Stiller Has

Stiller Has, 2009 Stiller Has, 2009
Allgmeini Informatione
Genre	Mundart
Gründig	1989
Website	http://www.stillerhas.ch
Gründungsmitglider
Endo Anaconda (Gsang, Text) Balts Nill (Gitarre, Banjo, Keyboards, Schlagzüüg, Mundharmonika, Gsang, Text; bis Herbst 2005)
Aktuelli Bsetzig
Endo Anaconda (Gsang, Text) René „Schifer“ Schafer (Gitarre, Tasteninstrument; sit 2002) Markus Fürst (Schlagzüüg) Salome Buser (Bass, Orgle, Mundharmonika, Gsang)

Gschicht

Ggründet worden isch Stiller Has im Mei 1989 vom Endo Anaconda und em Balts Nill, wo dervor scho i de Gruppe Hunger & Trunk, Caduta Massi und Andreas Flückiger & Die Alpinisten zäme sy ufträte. Stiller Has isch i der Chlykunscht-Szene bekannt worde mit teilwys nume minimaler musikalischer Begleitig vom Text. Spetischtens syt 1996 mit der CD Moudi ghöre si aber zu de bekanntischten und erfolgrychschte Schwyzer Bänds. Uf irne Tournée sy si o uf Dütschland und Öschterrych, u 1995 sy si uszeichnet worde mit em Kabarettprys Salzburger Stier und im dütsche Chlykunschtprys mit em Förderprys vor Stadt Mainz.

Syt 2002 ghört der Gitarrischt René Schifer Schafer offiziell zu Stiller Has, wo dervor scho a vilne CD-Ufnahme mitgschaffet het gha. 2005 het der Balts Nill ds Ensemble verla, derfür sy syt der CD Geischterbahn 2006 der Schlagzüger Martin Silver Silfverberg u der Bassischt Samuel Jungen derby.

Stil

Sehr wichtig für Stiller Has isch der massigi Endo Anaconda mit syre gwaltige Stimm. D Begleitig isch oft sehr sparsam, was füfzäh Jahr lang der vilsytig Balts Nill het prägt gha, wo mal Schlagzüg, mal Gitarre, mal Mundharmonika, mal Keyboard gspilt het, aber o mängisch mitgsunge.

Der Musigstil lat sech i kei traditionelli Schublade la verruume. Gwüss gits mal typische Blues wi im Stück Blaue Mäntig, aber denn gits o Aakläng a Rock, Rock ’n’ Roll, Volksmusig, Balladenen oder Country.

Vil Texte vo Stiller Has gäbe den eifache Lüt im trischten Alltag e Stimm. Wytbekannt isch der sträng korräkt Abwart Hene, wo schliesslech mit der Monetsmiete vom ganze Block abhout. Der Endo singt vo den oft unerfüllbare Sehnsücht: «Ha Sehnsucht nach em Süde, nach em blaue Meer, – ’s längt höchschtens bis a Murtesee, u am Murtesee ligt Schnee» (Süde). Und är singt vo sym tröie Begleiter, em Moudi, also em Kater: «Angeri Chatze würde Whiskas nä, i ha ne Moudi, däm muesch bständig Whisky gä» (Moudi). Alli Texte zeichne sech dür ne subversive Witz uus, was so wyt cha gah, das es eigetlechi Nonsense-Texte git: «Im Fensterkreuz baumelt ein General, weil Hängen jetzt Mode ist, verdammt noch mal!» (Erstickt der Kanari).

Diskografie

Studio-Albene:

• Stiller Has' (1989 als Kasette, vergriffe, 2001 als CD nöi useggä)
• Der Wolf ist los (1991)
• Landjäger (1994)
• Moudi (1996)
• Chole (1998)
• Walliselle (2000)
• Stelzen (2002)
• Geisterbahn (2006)
• 20 goldige Hasensongs (2007)

Live-Albene:

• Live auf Moudi Tour (1996, vergriffe)
• Poulet Tour (2004)

Singles:

• Giele (1995)
• Summer (1996)
• Fisch (1998)
• Walliselle (2000)

Links

• Syte vo Stiller Has – mit Hörprobene