Salzburger Schtier

Dialäkt: Alttoggeburgerisch

De Salzburger Schtier isch än wichtige Kunschtprys im dütschschprochige Ruum. De Name chonnt vonäre Legendä vo de Belagerig vo de Feschtig Hohesalzburg z Salzburg.

di vier Künschtler, wo 2013 än Salzburger Schtier gwone händ

s Bühnebild vom Salzburger Schtier im Johr 2013

De Prys chonnt jedäs Johr näbert öber, wo Chlykunscht oder Gabare macht ond vo Öschtrych, Dütschland oder vo de Schwiz chonnt. D Prys wärded amäne Feschtival, wo zwe oder drüü Täg goht, vomäne berüemte Künschtler öbergeh. De erscht Salzburger Schtier isch im Johr 1982 vogeh worde. Bis 1996 isch d Voraaschtaltig immer z Salzburg gsi. Sither wächslet mär i voschidäni Schtädt vo dene Länder, wo bim Salzburger Schtier mitmachet. Sit 1998 chonnt vo Zyt vo Zyt än Künschtler än «Ehräschtier» öber för sis Läbeswärk.

Vogeh werd de Prys vo de Kulturabtailige vo voschidene Radiosänder. Mitmache tüend de Südwäschtrundfunk, s Schwizer Radio ond Färnseh ond anderi öffentlich-rächtlichi dütschi Radiosänder osserhalb vom alemanische Schprochruum, de ORF ond sit äm Johr 2004 s Radio Rai Südtirol.

Bekannti Prysträger wo alemannisch ufträttet sind d Dodo Hug, de Lorenz Kaiser, d Birgit Schtänegger, de Viktor Tschagobbo, d Acapickels (1994), Ursus & Nadeschkin, de Simon Enzler, de Renato Kaiser, d Lara Schtoll, de Gabaretischt Dominic Deville und Patti Basler. De Emil ond de Franz Hohler händ än Salzburger Ehräschtier för eres Läbeswärch öberchoo.

Quelle

• Salzburger Stier d Internet-Site vo de Trägerschaft, de Arbetsgmänschaft för Onderhaltig vo dütschschrochige Sänder, abgruefe am 5. November 2018 (uf Hochdütsch)