Text:Louis Zumstein/Projet de mariage en 1864

Louis Zumstein (1805–1871)

Projet de mariage en 1864

Endsche Joseph hä besche Zid,
Wéllte wibo on ktuemo nid
Wellte giere as Schmockje hä,
As Hiersje geh on keis ergä.

Fan dschim Hiers de drette theil
Get’s der Liebschta em Ondretheil,
O’ was am Hiers noch blibe thued,
Gherd Peterschers Techter on dem bueb.

An drettel Hiers em ganze Lib
Escht of der Wield fer gar keis Wib,
Das were woll ou d'groschto Senn,
Wier dem Cheib noh gobte as Chenn!

Wier frägt aber: hei wier bescht?
Wenn a Cheib sche richen'escht
Drom hä Joseph d’beschto Zid,
Angelique entgeimo nid.

Wette geits de en der Eh?
Das chammo en dschim Hus erseh:
Woa keis Hiers, macht ds’ Gield eim Mued,
Doa escht kei Freid, soscht altsche gnueg!

Oane Hiers wie Tene Franz
Fieren d’Wiber doch am Schwanz:
Di sin glecklech, eh glaupen schier,
Groa wie ds’feh on andre Thier.

Fless on detsche hä mänge Schord
Helfgott diene, woa di hein khord.
Wier weis noch was fer Chenn di hein
Wenn gsonne o’ chrange ziäme schlein?

Mo lebt bschtändeg en der Piin
Wo Eiter escht on Bocka siin
Was netzt Selber on Gold em Schoos,
Wenn eim ds'Hiers schprengt fa verdros!

15 Mai 1865