Toshiro Mifune

De Toshiro Mifune (jap. 三船 敏郎 Mifune Toshirō; * 1. Aprile 1920 z Qingdao, Republik China; † 24. Dezember 1997 z Tokio) isch en japanische Schauspiler, Filmproduzent und -regisseur gsi. Er het in 134 Filme mitgschpilt und het dadefür öppe 60 verschidnigi Uszeichnige übercho.

Läbe

De Mifune isch in de Schtadt Dalian ufgwachse, wo an de Küschte vo China ligt und in dere Ziit vo Japan bsetzt isch gsi. Sin Vater het es Fotogschäft gha, wo de Mifune scho ghulfe het, wo er es Chind isch gsi. Im 1949i isch er in di japanisch Armee iiberufe worde, wo er zu de Luftwaffe cho isch, für di er Luftufnahme gmachet het.

Nach em Chrieg het er Kameramaa welle werde und het im 1946 z Tokio e Schtell bi de Filmgsellschaft Tōhō gfunde. Derte isch er aber nöd Kammeramaa gsi, sondern Schauspiler. Sini erschti Hauptrolle isch im Film Ginrei no Hate (1947) di vomene Bankräuber gsi. Die «böse» Rolle sind ihm zerscht emol blibe, so het er im 1948i in Yoidore Tenshi en Gangster gschpilt und 1950 in Rashō-Mon en Räuber. Im 1958 het er in Die verborgene Festung en zwilichte General verkörperet, wobi er in di Rolle au humoristischi Element het la iiflüsse.

Zwüsche 1948 und 1965 het er in de meischte Film vom Regisseur Akira Kurosawa d Hauptrolle übernoh. Wältwiti bekannt worde isch de Mifune mit de Rolle vom Ussesiter im Film Di sibe Samurai im 1954. Im 1957i het er dann in Nachtasyl gschpilt, im gliiche Johr in Das Schloss im Spinnwebwaldund im 1963i in Zwischen Himmel und Hölle, ere Verfilmig vomene Kriminalroman vom Ed McBain.

Bim Filmfeschtival vo Venedig het er d Copa Volti, d Uszeichnig für de bescht Hauptdarstelle, für sini Rolle in de Film Yojimbo – Der Leibwächter (1961) und Rotbart (1965) übercho. Am em 1966i het er dann au bi internationale Produktione mitgschpilt: In Grand Prix vom John Frankenheimer, 1968i in Hell in the Pacific vom John Boorman, 1971 in Soleil rouge und 1976 in de Schlacht um Midway vom Jack Smight. Au in de US-Filmserie Shogun het er mitgschpilt und zwar het er derte de Fürscht Toranaga verkörperet.

Im 1962 het er e Prodiktionsfirma gründt, Mifune Productions und im 1963 het er zum erschte Mol Regii gführt im Film Gojū-man-nin no Isan. Im 1966 het er in Tokio es eigeds Studio eröffnet und im 1981 e Schauspilschuel. D Schuel het aber drei Johr schpöter müesse schlüsse.

Weblink

 Commons: Toshirō Mifune – Sammlig vo Multimediadateie

• Toshiro Mifune in de Internet Movie Database (änglisch)
• Dütschi Zämefassig vo sinere Biografii