Dr Dootedanz isch e Blatz im Baasler Vorstedt-Kwardier grad näbe dr Breedigerkiirche, wo hüte dr christkatholische Kiirche ghöört. Uf em Blatz het d Baasler Stadtgärtnerei e Bluemegaarde aapflanzt, won e Gländer drum ume isch. Dr Blatz verbindet dr Bluemeräin uf dr äinte Site mit dr Spidaalstrooss und uf dr andere mit dr Santihannsvorstadt.
D Muure mit dr Daarstellig vom Baasler Dootedanz wird abgrisse, 5. und 6. August 1805. Im Hindergrund: s innere Santihans Door, wo 1873 abgrisse worde isch. D Strooss zum Door isch d Santihannsvorstadt.
Usschnitt us dr Stadtaasicht vo Basel vom Matthäus Meriaa em Eltere, 1642.[1] S Dominikanerklooster (25) isch rächts vor dr innere Stadtmuure und em Petersgraabe, in dr Middi vom Usschnitt. D Breedigerkiirche isch gegen e Rhii zue. 26: Uf dr Innemuure vom Friidhoof isch dr Baasler Dootedanz gmoolt gsi.
S Geburtshuus vom Johann Peter Hebel isch am Dootedanz 2. Früener isch säll Stück Strooss no Däil vo dr Santihannsvorstadt gsi.
Uf em Gländ vom hütige Dootedanz häi im Middelalter d Dominikaner vom Breedigerklooster e Friidhoof gha. Uf dr innere Site vo dr Umfriidigsmuure isch dr berüemt Baasler Dootedanz druf gmoolt gsi. Mit dr Reformazioon isch s Klooster ufghoobe worde, aber si Kiirche isch vorlöifig e Gotteshuus bliibe, das vo dr französischsproochige reformierte Gmäind; denn het mä sä as Laager brucht. Dr ganz Kloosterkomplex isch nodinoo verlotteret. 1805 isch d Friidhoofmuure mit dr Dootedanzdaarstellig abbroche worde, und eso isch dr ehemoolig Laiefriidhoof zum ene offene Blatz worde. E Däil vom Gländ uf e Rhii zue isch brucht worde, zum d Santihannsvorstadt verbräitere und greeder mache, und näbe dr Breedigerkiirche het mä spööter e Verbindig vom Petersgraabe zur Spidaalstrooss baut. Dr Naame vom ehemoolige Bild dört isch im ganze Gländ bliibe.
↑ Uf dr Aasicht vom Matthäus Meriaa em Eltere vo 1642 gseet mä s Dominikanerkloster (25) mit dr Breedigerkiirche gegen e Rhii zue rächts näbe dr innere Stadtmuure und em Petersgraabe näbedraa. Und witer unde uf e Rhii zue dr Friidhoof mit de Böim und dr Dootedanzmuure.
S Geburtshuus vom Johann Peter Hebel am Dootedanz 2
Dr Boggstächerhoof am Dootedanz 17
D Breedigerkiirche am Dootedanz 19
Dr Basiliskebrunne am Dootedanz, sit 1896 bis hüte, mit ere chliine Pause zwüschen ine.
