Tyrrhener

D Tyrrhener oder Tyrsener (agr. Τυρρηνοί, Tyrrhēnoí; Τυρσηνοί, Tyrsēnoí; latiin. Tyrrhēnī) sind en antiks Volch gsii. De Name isch di griechischi Bizaichnig vo de Etrusker.

Noch antike Quelle hend d Tyrrhener i de Nöchi vo de Lydier im nordwestliche Chliiasie glebt. Wegere Hungersnot sind si denn under de Laitig vom Tyrrhenos uf Italie uusgwanderet. Dem si Soo Tarchon het zwölf etruskischi Städt ggründet.

Scho i de Antiki het de Dionysios vo Halikarnassos abgstriite, as d Etrusker usem ägäische Ruum iigwanderet saiet, sondern gmaint, as die z Italie autochthon saied.

D Stele vo Lemnos, wo im 19.Jh. gfunde woren isch, biwiist, ass tatsächlich im 6.Jh.v. Chr. uf de Insle Lemnos e Volch glebt gha het, wo mit de Etrusker verwandt gsii isch. Aber Ainzelhaite sind no nöd gchlärt.