Dr Verwaltigsroot in dr Schwiz
Dr Verwaltigsroot (VR) isch s oberste Exekutivorgan, wo noch em Schwizer Obligazioonerächt) für d Füerig vo de Gschäft von ere Akziegsellschaft (AG) zueständig isch, solang nit d Generaalversammlig (GV; d «Legislative» vo dr AG) zueständig isch. Es bestoot doo e Kompetänzvermuetig zugunste vom Verwaltigsroot.
Organisazioon
ändereDr Verwaltigsroot wird vo dr Generalversammlig gweelt. Er sätt nid em Ufsichtsroot in Dütschland oder Ööstriich vergliche wärde. Im Geegesatz zum Ufsichtsroot isch dr Verwaltigsroot nit nume s Ufsichtsorgan (Art. 716a Abs. 1 Ziff. 5 OR), sondern gliichzitig für d Ooberläitig vo dr Gsellschaft (Art. 716a Abs. 1 Ziff. 1 OR) verantwortlig. Es cha zwar e Geschäftsläitig (Dütschland und Ööstriich: Vorstand) iigsetzt wärde, aber dr VR cha deere d Ooberläitig nit überdrääge (Art. 716a Abs. 1 OR: «...unübertragbare und unentziehbare Aufgaben...»). D. h., noch em schwizerische Akzierächt isch s nid umbedingt nöötig, ass e Gschäftsläitig iigsetzt wird. Mä reedet in däm Fall mänggisch von ere «Chliine AG» noch em Schwizer Wirtschaftsrächt. E Gschäftsläitig wird in dr Braxis aber bi gröössere Gsellschafte immer iigsetzt, und eso si schwizerischi Akziegsellschafte nooch zum dualistische Süsteem vo dr Undernäämensfüerig in Dütschland und Ööstriich, aber doch nid genau gliich.
Dr Verwaltigsrootsbresidänt (VR-P) isch dr Bresidänt vom Verwaltigsroot (VR) von ere Schwizer Akziegsellschaft (AG). Dr VR-P isch primus inter pares; er het die gliiche Befuegniss wie die andere VR-Mitgliider, aber bi Abstimmige chann er e Stichentschäid mache (Art. 713 Abs. 1 OR). Er wird vom VR sälber gweelt, solang d Statute d Waal vom VR-P nit dr GV überdrääge. Wie die andere VR-Mitgliider, wird er uf drei Joor oder uf en anderi Amtszit gweelt, wie s vo de Statute bestimmt wird (Art. 710 Abs. 1 OR). Jedes VR-Mitgliid hafdet für e Schaade, wo s dur absichtligi oder faarlässigi Pflichtverletzige verursacht (Art. 754 OR).
Bsundrigs im Vergliich zur dualistische Organisazion vo dr Gschäftsläitig z Dütschland und in Ööstriich isch dr Verwaltigsrootsdelegierti (VR-D). Wenn e VR-D ernennt wird, so het er e Dobbelstellig as VR und gliichzitig as Mitgliid vo dr Gschäftsläitig.
Ass dr Verwaltigsroot rächtmässig zsammegsetzt isch, isch fundamentaal für d Gsellschaft. Wenn dr Verwaltigsroot nüm cha bsetzt wärde, oder wenn Zaal vo de Verwaltigsrööt oder Diräkter, wo berächtigt si zur Underschrift und e Woonsitz in dr Schwiz häi, chliiner isch as s Gsetz es verlangt (Art. 718 OR), denn foot e sogenannts Organisazioonsmängelverfaare aa (Art. 731b OR). Mit däm Verfaare söll d Organisazioon vo dr Gsellschaft wider rächtsmäässig gmacht wärde; wenn das nit grootet, denn wird d Gsellschaft ufglööst und likwidiert.[1]
Liddratuur
ändere- Roland Müller, Lorenz Lipp, Adrian Plüss: Der Verwaltungsrat. Verlag Schulthess, Züri; 3. Uflaag, 2007; ISBN 978-3-7255-5437-9.
- Felix Wunderer: Der Verwaltungsrats-Präsident. Verlag Schulthess, Züri, 1995; ISBN 978-3-7255-3372-5.