S Vesalianum

47.5579722222227.5830555555556Koordinate: 47° 33′ 28,7″ N, 7° 34′ 59″ O; CH1903: 610871 / 267483

Im Vesalianum an dr Vesalgass 1 im Baasler Vorstedtkwardier si s Zoologische Instidut vo dr Uniwersidäät Baasel, d Umwältwüsseschafte und Däil vom Füsiologische Instidut dehäi. Usserdäm het s no Höörsääl.

Gschicht

S Vesalianum isch 1884/85 zwüsche dr Spaalevorstadt und em alte Züüghuus am Petersblatz entstande. Dr Archidekt isch dr Paul Reber gsi, wo au d Baasler Sünagooge baut het. Es isch für d Anatomii- und Füsiologiiabdäilig dänggt gsi und het dorum dr Naame vom Anatom Andreas Vesalius überchoo, wo uf Baasel cho isch, wil doo 1543 si berüemts anatomischs Daafelewärk «De humaniscorpora fabrica» in dr Offizin vom Oporin druggt worde isch. Wäred er z Baasel gwoont het, het dr Vesal en öffentligi Sekzion vom ene Liichnaam vom ene Mensch gmacht, wo seer bekannt worde isch.

Wie scho wo s Bernoullianum baut worde isch, het au bim Vesalianum die Freiwilligi Akademischi Gsellschaft (FAG) d Helfti vo de Bauchöste übernoo. 1885 isch s Geböid iigweit worde. Dört isch denn dr Friedrich Miescher (1844-1895), wo d Nukleinsüüri entdeggt het, 1871 Brofässer für Füsiologii worde und het s erste Füsiologische Instidut in dr Schwiz gründet.

Öbbe vier Joorzäänt lang häi d Anatome und Füsiologe zämme im Vesalium gschafft, bis 1921 d Anatome in die nöiji Anatomischi Aastalt im Santihans züüglet si. 1921 isch die Fysiologisch-Chemischi Aastalt (s Bio-Chemische Instidut) gründet worde und im Joor druf s Farmakologische Instidut und bäidi si in s Vesalianum choo. 1931 isch no d Abdäilig für Vitaminundersuechige drzuechoo. 1941 si d Farmakologe wider uszooge. 1962 het mä s Vesalianum afo erwitere und im Weste a Höörsaal aabaut.

Dr erst jüüdisch Friidhoof z Baasel

Wo s Vesalianum 1884/85 baut worde isch, het mä 25 Greeber gfunde, Räst vom erste Jüdische Friidhoof in Baasel. Dä Friidhoof isch 1264 zum erste Mol in de Urkunde erwäänt. Im Baasler Juudepogrom 1348/49 isch er verwüestet worde. Mä het Hunderti vo Graabstäi gstoole und as Baumaterial wider verwändet. Wo in de 1930er Joor s alte Züüghuus abbroche worde isch, zum Blatz für s nöije Kollegiehuus vo dr Uniwersidäät Baasel mache, het mä no mee Greeber entdeggt mit 150 Skelett, 10 Graabstäi und 25 Graabstäifragmänt.

Kwelle

Das Vesalianum uf unibas.ch, abgrüeft am 18. Novämber 2014
Universität Basel, Vesalianum, Vesalgasse 1, Basel (Site cha nüme abgrüeft wärde; Suche im Webarchiv)[1] [2] Vorlage:Toter Link/www.etavis.ch uf dr Website vo dr etavis.