Andreas Vesalius

Dr Andreas Vesalius (au: Andreas Vesal) (* 31. Dezämber 1514 z Brüssel; † 15. Oktober 1564 uf Zakynthos; äigentlig Andreas Witinck) isch e flämische Anatom in dr Zit vo dr Rönessans gsi und gältet as dr Begründer vo dr nöizitlige Anatomii und vom morfologische Dänke in dr Medizin. Er isch dr Liibarzt vom Kaiser Karl V. gsi und vom Philipp II. vo Spanie.

Lääbe

Dr Vesalius het an dr Uniwersidäät Löwen Sprooche und Wüsseschafte studiert und vo 1531 aa Medizin. 1533 isch er uf Bariis, wo s Seziere vo Liiche verbote gsi isch, und het mit em Miguel Serveto under em Jacques Dubois (Jacobus Sylvius) und em Johann Winter galenischi Medizin und Anatomii studiert. Denn isch er zrugg uf Löwen und het im Ghäime d Liiche vom ene Hiigrichtete seziert.^[1] 1537 het er si ersti öffentligi Sekzion usgfüert.^[2] 1537 het dr Vesalius si Paraphrasis ad nonum librum Rhazae uusegee.

Denn isch er uf Norditalie. Am 3. Dezämber 1537 het er z Padua bromowiert und am neggste Daag isch er zum Brofässer für Chirurgii und Anatomii ernennt worde. Noch säggs Joor z Padua isch er uf Venedig und isch dört Brofässer für Chirurgii worde. 1538 het er d Tabulae anatomicae sex uusegee, denn e Nöiusgoob vo de Institutiones anatomicae vom Johann Winter. Im Vesalius si Aderlassbrief isch 1539 erschiine, 1541 drei Draktaat zun ere Usgoobe vom Galen.

De humani corporis fabrica libri septem

Vo 1538 bis 1542 het dr Vesalius sis groosse Wärk verfasst und mit em die nöizitligi Anatomii begründet.^[2] In dr Fabrica het s öbbe 200 Illustrazioone. S Wärk isch 1543 z Baasel bim Verleger Johannes Oporinus erschiine. Dr Vesalius isch sälber uf Baasel und het im Mai 1543 en anatomischs Kolloquium abghalte und e Skelett vorgfüert, wo hüte no as s Vesalsche Skelett in dr anatomische Sammlig z Basel isch.

1555 isch die zwäite, verbessereti Uflaag vo dr Fabrica erschiine. Dr Vesalius isch dr Liibarzt vom Philipp II. worde, isch 1564 ins Häilige Land bilgeret, und isch uf dr Räis zrugg z Zante gstorbe.

Litratuur

Gernot Rath: André Vésale, in: Exempla historica. Epochen der Weltgeschichte in Biographien, Bd.27. Fischer Tb.: Frankfurt/M. 1984, S.23–41.
Andrew Cunningham: The Anatomical Renaissance. The resurrection of the anatomical projects of the ancients. Ashgate, Aldershot u. a. 2003, ISBN 1-85928-338-1.
Axel Hinrich Murken (Einf.): Die schönsten Holzschnitte aus Andreas Vesals „De humani corporis fabrica. Libri septum“. F. Coppenrath Verlag, Münster 1978.
Charles Donald O’Malley: Andreas Vesalius of Brussels, 1514–1564. University of California Press, Berkeley CA u. a. 1964.
Moritz Roth: Andreas Vesalius Bruxellensis. Reimer, Berlin 1892.
Moritz Roth: Vesalius, Andreas. In: Allgemeine Deutsche Biographie (ADB). Band 39, Duncker & Humblot, Leipzig 1895, S. 639–648.

Weblingg

Commons: Andreas Vesalius – Sammlig vo Multimediadateie

Originalwärk:

Fuessnoote

↑ Martin Ambrein: Einblicke ins Innerste. NZZ 31. Dezämber 2013,
↑ ^2,0 ^2,1 Charles Donald O’Malley: Andreas Vesalius of Brussels, 1514–1564. University of California Press, Berkeley CA u. a. 1964.

Dä Artikel basiert uff ere fräie Übersetzig vum Artikel „Andreas_Vesalius“ vu de dütsche Wikipedia. E Liste vu de Autore un Versione isch do z finde.

[1] Martin Ambrein: Einblicke ins Innerste. NZZ 31. Dezämber 2013,

[Charles_Donald_O’Malley-2] 2,0 ^2,1 Charles Donald O’Malley: Andreas Vesalius of Brussels, 1514–1564. University of California Press, Berkeley CA u. a. 1964.

[1]

[2]