Volvo 240

Dr Volvo 240 isch äs Modäll vum schwedischä Autoherschtellär Volvo.

Allgemeins

Der Volvo 240 isch s Nachfolgemodäll vum Volvo 140 und isch vu 1974 bis 1993 baut cho. Äs isch zur damaligä Ziit z wichtigscht Modäll vu Volvo xi und hät uber Wiiterbeschtoo oder Niedergang von der Firma entschiedä. Vor alläm ufm wichtigä US-Amerikanischä Markt hätt dLimousinä vill Cheufär gfunnä, in Europa hingegä eher der klassisch Combi.

Äs sind denn verschiedeni Carosserievariantä baut cho: 2- oder 4-Türigi Limousinä, Combi, Coupé oder Sonderversionä wiä verlegneräti Limousinä und Combi und mit der Basis au Chrankä- und Beschtattigsfahrzüg. Produktionszahlä gmäss Volvo: Insgesamt 2,8 Millionä, 1 Million Combis, 1,6 Millionä Limousinä und 200.000 Coupés.

Motor und Getriebe

Motor B21A in Volvo 244 GL, 1980

Der 240er isch mit verschiednä Benzin- und Dieselmotorä baut cho: D' 4-Zylinder Benziner nach 1976 sind all nachm gliichä Baumuschter entwicklät xi: Graugussblock, Zahriemä, Lichtmetall-Zylinderchopf und -Chölbä, obäliggendi Nochäwellä mit Zahriemä. D' V6-Benziner sind us der Kooperation vu Volvo mit Peugeot und Renault entschtannä. D' 6-Zylinder-Reihä-Diesel sind vu VW zuäkauft und für teils Märkt au nu mit 5 Zylinder ahbottä cho. D' Benziner geltät als überuus robuscht, d'Diesel weniger.

All Motorä sind mit 4-Gang-Getriebe mit und ohni Overdrive (Laycock-de-Normanville) oder schpäter mit 5-Gang-Getriebe, oder denn mit 3-Stufä-Automat (Borg-Warner) und schpäter mit 4-Stufä-Automat (Aisin-Warner) erhältlich xi. D'Schmiirig vu allnä Getriebe ärfolgt mit ATF, au d'Handschaltmodäll!

Sicherheit

Der Volvo 240 isch zu siner Ziit äs sehr sichers Auto xi und isch fer das au mit summi Priisä uszeichnät cho. 1976 hät di US-amerikanisch Vercherssicherhaitsbhördä NHTSA der Volvo 240 als Referenzfahrzüg ferd Sicherhaitsforschig gwählt. Das, wil d'Amerikaner am Volvo 240 der bescht Insassäschutz vu allnä Fahrzüg in der Klass atteschtiert hend!! 1991 hät ds Versicherigsinschtitut Insurance Institute for Highway Safety IIHS inra grossä Studiä der Volvo 240 Combi als sicherschts Fahrzüg vum Jahr ufm amerikanischä Markt gwählt! Seriämässig und als Wunschusschtattig sind im Volvo 240 vil damals na nid selbschtverschtändlichi System und Merkmal erhältlich xi. Z. B. Knautschzonä vornä und hinnä, stabilä Innärum, Zahschtangalenkig, Sicherheitslenksüülä, massivi Rohr in dä Türä fer dä Siitäufprallschutz, polschteräts Armaturäbrätt, 4 Schiibäbremsä, Gurt-Warnliächt, Reflektor in dä Türä. Di letschtä Fahrzüg sind schu mit Airbag lieferbar xi.

Umwelt

Der Volvo 240 isch schu 1975 in dä USA (als erschts Auto wältwiit) mit greglätm Katalysator und Lambdasondä erhältlich xi.

Marktsituation

Der Volvo 240 isch zu siiner Ziit sehr beliäbt xi und hät summi Vorzüg bottä; Sehr hochä Sicherhaitsstandart, sehr robuschti Bauwiis, chliinä Wendechreis, relativ guäti Winter- und Zugfahrzügeigäschaftä. Hüt sind vill Fahrzüg in armi Lendär exportiert, ma xeht aber na immer 240er als Gebruuchtwägä.

Literatur

Dieter Günther und Boris Schmidt: „Sicherheit aus Schwedenstahl – Volvo 140 bis 260“, autovision, Hamburg, 2004

Reparaturanleitung Nr 288 und 289 "VOLVO 240" Verlag Bucheli, ZUG.

Björn-Eric Lindh "VOLVO - Von den 20ern in die 80er Jahre" VÖRLAGSHUSET NORDEN AB

Christer Olsson und Henrik Moberger "Volvo -Gothenburg Sweden- NORDEN PUBLISHING HOUSE LTD.

Christer Olsson "VOLVO Personenwagen seit 1927" Motorbuchverlag, 2000

Volvo 240 Service Manual: 1983-1993 by Bentley Publishers USA 1998 (für anglophili Hobbyschruuber bedingt geeignet)

Weblinks

Commons: Volvo 240 – Sammlig vo Multimediadateie

Ausführliche Übersicht zur 200er Serie