Vorstadttheater Basel

Dialäkt: Baseldütsch

S Vorstadttheater Basel isch e Theater für Chinder an dr Dalbevorstadt 12 z Basel.

Gschicht

S Theater isch 1974 under em Name Spilkischte gründet worde. D Gründer vom Theater, dr Gerd Imbsweiler und d Ruth Oswalt,si beidi vom Theater Basel choo und hai ufgrund vo ihrene Erfahrige am Stadttheater d Lust und d Motivation gha, en eignigs Theater z gründe. 1999 isch dr Name vom Theater zu «Vorstadttheater Basel» gänderet worde.

D Spilkischte isch s erste Theater für Chinder in dr Schwiz gsi, wo s ganze Johr duure gspiilt het. Vo Aafang aa het s as en Art Kollektiv ohni hierarchischi Strukture funktioniert. S Ensemble het gliichzitig die künstlerischi und die organisatorischi Leitig übernoh.

Scho im erste Johr vo siner Existänz isch s Team einersits mit sine Stück uf Tournee gange und het andrersits anderi Grubbe zu Gastspiil iiglade, so dass si eignig Theaterruum, wo im Ensemble sehr wichdig gsi isch, guet usgnützt gsi isch.

S Brogramm

Wil s nid gnueg Vorlage für Stück gee het, won em zuegsait hai, het s Team bald aagfange, eignigi Ideä zu Stück z verarbeite. So si in de erste Johr e Hufe ungwöhnligi Theaterstück entstande, wo zwar z Basel und uf Tournee erfolgriich gsi, aber nie dr Sprung in e Theaterverlag gschafft hai.

Eigebroduktione git s öbbe zwei im Johr, wo denn jedi bis zu siibe Wuche lang ufgfüehrt wird. Es wärde au neui Broduktione vom Schwizer Chindertheater ufgfüehrt, und es git Gastspiil us em dütschsproochige Usland.

Uszeichnige

1987 het s Theater Spilkischte dr Kunstbriis vo dr Stadt Basel überchoo, 1995 dr ASTEJ-Briis für Kulturvermiddlig und 1999 si die beide Gründer vom Theater, d Oswalt und dr Imbsweiler, mit em Hans Reinhart-Ring, dr höggste schwizerische Theateruszeichnig gehrt worde und mit em Briis vo dr internationale ASSITEJ, em Wältverband vo de Theater für e jungs Publikum.

Weblingg

• D Website vom Vorstadttheater Basel

47.554627.595337

Dä Artikel basiert uff ere fräie Übersetzig vum Artikel „Vorstadttheater_Basel“ vu de dütsche Wikipedia. E Liste vu de Autore un Versione isch do z finde.