As e chinesischi Undergruppe vu dr Pfingschtbewegig vum Chrischtetum, wo churz nooch 1900 entstande isch, isch die Wohr-Jesus-Chilche e (unabhängigi) Chilche, wo 1917 z'Beijing (Peking) in China gründet worre isch. Dr gegewärtig gwählt Präsi vu dr Internationale Versammlig vu dr Wohre Chilche vum Jesus isch dr Prediger Yung-Ji Lin. Es git öppe 1,5 Millione Gläubigi uf alle seggs Kontinent. Zue dr Lehr vu sällere Chilche ghört dr Glaub an die usschliesslich Göttlichkeit vum Jesus, d. h. d' Zweinaturelehre Christi, formuliert im Konzil vu Chalkedon 451, wird abglähnt.

Sälli Chilche stoht mit sällere Asicht in dr Tradition vum Monophysitismus, wo zwische 400 un 650 in dr südöschtliche Provinze vum Römische Riich die dominierend chrischtlich Konfession gsi isch.

Ebefalls abglähnt wird d'Lehr vu dr Trinität (Dreifaltigkeit). Dr Empfang vum Heilige Geischt symbolisiert aber, dass die Gläubige s'Himmelriich erbe.

Wie im Judetum isch dr Samschdig un nit dr Sunndig dr heilig Wuchedag.

Als wesetlichi Sakramente gelte Daifi, Fuesswäschig un die heilig Kommunion.

Säll alles zämme bildet die fümf Hauptlehre vu sällere Konfession, wo si mit entsprechede Stelle ussem Nöie Testament begründet.

Vu dr grosse christliche Fyrdig werre Wihnächte un dr Karfridig als vu heidnischem Ursprung abglähnt. Beidi Däg hän nämlig ihr Ursprung in wichtige Feschte vu andere Religione im alde Römische Riich un ihr Ibernahm in dr christlich Feschtkalender isch dorum domols essentiell fer d'Akzeptanz vu dr neje Staatsreligion gsi. Dass die Wohr Chilche vum Jesus sälli Feschter ablähnt, lit dorum wohl au an ihrem Gründigsort. Dr Chinese fählt dr vorchrischtlich kulturell Hindergrund vu viilene chrischtliche Feste völlig, weswäge si - nit untypisch fier Konvertite - in dr Uslegig vu dr Religion kompromissloser sin.

D fümf Hauptlehre ändere

D fümf Hauptlehre vo dr Wohr-Jesus-Chilche sind:

  1. De Hailig Gaischt: "Das miar der Hailig Gaischt empföhnd, so wian är sich mit dr Zungared zaiga tuad, isch d Bestätigung drfür, dass mr ds Himmelrich übrchomend."
  2. Wassertaufi: "D Wassertaufi isch ds Sakrament, wo dr Erlösig von da Sünda und drmit dr Ernüerig dianet. Di Taufi muas i natürlichem, lebendigem Wasser, also ätta ima Fluss, ima Meer oder inara Quella stattfinda. Dr Täufer, wo sälber schon di Taufi mit dem Wasser und em Haligia Gaischt empfanga hed, füart di Taufi im Nama vom Herr Jesus Chrischtus us. Und dia Person, wo d Taufi übrchund, muas ganz im Wasser undertaucht wärda mitem Chopf vürsche gäboga und mit em Gsicht nach una."
  3. Fuasswäschig: "Ds Sakrament von dr Fuasswäschig ermöglichet ainem, Antail am Herr Jesus z han. Es dianet au als stendigi Mahnig dra, dass ma Liabi, Heiligkait, Demuat, Verzaihig und Dianschtbereitschaft üaba söll. Jedi Person, wo d Wassertaufi empfanga hed, muass sini, bzw. ihri Füass im Nama vom Herr Jesus Chrischtus wäscha lah. Gägasitigi Fuasswäschig cha praktiziart wärda, wenn das agmässa ischt."
  4. Hailig Kommunion: "Di hailig Kommunion isch das Sakrament, mit dem ma an da Tod vom Herr Jesus Chrischtus daicha tuat. Es git ünsch ds Rächt, am Flaisch und Bluat vom Herr tail ds han und midem Gmaindschaft ds han, drmit miar ds ewiga Läba übrchomend und am Jüngschta Tag uferstahn chönd. Das Sakrament söll so viel wia mügli ghalta wärda. Nu ungsürets Bort söll ma brucha und nu a bitschi Wiin gatrucha wärda."
  5. Sabbat-Tag: "Dr Sabbat, dr 7. Tag vor Wucha (Samstig), isch a hailiga Tag, wo vo Gott gsägnet und ghailigt isch. Äs söll im Adaicha and Gnad vom Herr, sinara Schöpfig und vor Erlösig beganga wärda und ir Hoffnig uf di ewig Ruah im Jensits."

D fümf Zusatzlehren zu dr 10 Artikel ändere

  1. Jesus Chrischtus: "Dr Jesus Chrischtus isch das flaischwordana Wort, är isch gschtorba am Chrüüz fürd Vergäbig von da Sünder, ufrstanda am dritta Tag und ufgfahra in da Himmel. Är isch der ainzig Erlöser vor Menschhait, dr Schöpfer vom Himmel und dr Ärda und der ainzig wahr Gott"
  2. Heilig Bibel: "D'heilig Bibel wo vo Gott inspiriert worde isch und usem Alte und em Nöie Teschtamänt bestoht isch die einzigi niedergschribnigi Wahrheit und ds Mass fürnes chrischtlichs Läbe."
  3. Erlösig: "D'Erlösig wird dur d'Gnade vo Gott und dure Glaube gschänkt. Glöibigi müesse em Heilig Geischt vertraue, wenn si nachemne heilige Läbe strebe, de Gott ehre und d'Menschlichkeit liebe wänd."
  4. Chilche: "Die Kirche wo vom Herr Jesus Christus und dure Heilig Geischt ir Zit vom "Späträge" gründet worde isch, isch die wieder hergstellti Wahri Kirche der aposchtolische Zit."
  5. Widerkunft vom Christus: "D'Widerkunft vom Christus wird am Jüngschte Tag stattfinde wenn Är vom Himmel abestigt um d'Wält z'richte: Die Grächte wärde ds ewige Läbe empfoh, während die Böse uf ewig verdämmt wärde."