Walter Möll

Dr Walter Möll (* 1950 z Singe am Hontes) isch e dytsche Kulturmanager.

Lääbe

Dr Möll het rund 45 Johr lang bi dr Stadt Singe gschafft, dervu 43 Johr im Beraich Kultur. Är isch Laiter vum Singemer Kulturamt gsii, ab 1995 Laiter vum Beraich Kultur un Turischtik un ab 2007 Schef vu dr Kultur und Touristik Singen (KTS) un Gschäftsfierer vu dr Stadthalle Singen GmbH. Är het si iber vyl Johr fir d Kultur un dr Turismus in dr Region yygsetzt. Anne 1989 isch unter syre Fäderfierig e Arbetsgmainschaft grindet wore, wu mit em Burgewäg, em Gartenerläbnis un em Radwägnetz d „Marke Hegau“ in dr Gränzregion zwische Rhyfall un Bodesee entwickelt het. Är het s dytsch-schwyzerisch Literaturfeschtival „Erzählzeit“ ins Läbe gruefe un s Singemer „Hohentwielfestival“ 1974 um e Jazz-Feschtival un e Burgfescht mit Chlaichunscht un Musik uusgwytet. Im Septämber 2013 isch dr Möll pensioniert wore.

Dr Möll isch Mitglid bi dr Muettersproch-Gsellschaft un syt 1981 Vorsitzer vu dr Regionalgruppe Hegau. Wu im Mai 2002 dr Klaus Poppen, dr langjehrig Bresidänt vu dr Muettersproch-Gsellschaft, sy Amt abgee het, isch dr Möll zum Bresidänt gwehlt wore. Är het si as Interrims-Präsi gsää un het gsait, är wett nume eso lang im Amt blybe, bis e Noofolger gfunde wurd. Am 28. April 2007 isch derno dr Franz-Josef Winterhalter zum neie Bresidänt gwehlt wore. In syre Amtszyt het d Muettersproch-Gsellschaft verschideni Dialäktwettbewärb mitorganisiert, unter anderem dr nei Gerhard-Jung-Wettbewärb fir jungi Mundart un dr Wettbewärb Mir sueche die Beschde. Anne 2006 isch mer in e neii Gschäftsstell z Mille zoge un het mit dr Friedel Scheer-Nahor e Gschäftsfiereri aagstellt. Derzue het d Muettersproch-Gsellschaft im Friejohr zäme mit em Verain „schwäbische mund.art e. V.“ dr Arbetskrais „Mundart in der Schule“ grindet. Fir syni Verdienscht um d Muettersproch-Gsellschaft isch er anne 2015 mit dr Ehrenodle vum Arbetskrais „Alemannische Heimat“ e. V. uuszaichent wore.

Dr Möll isch Grindigsmitglid vu dr Hecker-Gruppe Singe, wu s hiostorisch Erb vum badische Demokrat un Revolutionär Friedrich Hecker bfläge duet. Derzue engaschiert si dr Möll fir d Singemer Fasnet.

Weblink

• Oliver Fiedler „Lebenslänglich“ für Walter Möll, wochenblatt.net, 21. Septämber 2013
• „Alemannische Heimat“ würdigt Walter Möll, in-singen.de, 21. Dezämber 2015
• „Ihr hen mer's Läbe richer gmacht“, Badische Zeitung, 27. Mai 2002