Wikipedia:Machtstruktur

D Machtstrukture in dr Wikipedia sin mit dr Johre gwagse un wäge däm kompliziert un inenander verflochte.

Uf däre Syte wird versuecht, di verschidene Elemänt z bschrybe.

Anarchistischi Elemänt

E jede cha in dr Wikipedia mitmache. Doderzue muess mer sich nit aamälde, mer muess sy Name nit nänne un au kei E-Mail-Adräss aagee. Mer cha anonym mitmache, unter eme Pseudonym oder unter verschidene Benutzernäme, aber au unter sym richtige Name.

Au in dr Richtlinie un Regle git s anarchistischi Elemänt, z. B. do: Ignorier alli Regle.

Demokratischi Elemänt

Mit dr Johre sin in dr Wikipedia au demokratischi Strukture entwicklet wore.

Vil Richtlinie un Regle sin iber langi Diskussione (Meinigsbilder) entstande. E jede Benutzer cha ne neji Diskussion aafange zuen ere Regle oder ere Richtlinie (in dr Alemannische Wikipedia zmeischt uf em Stammtisch). Vil Regle sin in sonige Diskussion dur Konsäns entstande, anderi sin dur e Abstimmig entschide wore.

Administratore un anderi Ämter (z. B. Bürokrate, Stewards, Checkuser usw.) wäre in demokratische Wahle gwehlt.

Bi Abstimmige mitmache cha e jede Benutzer, wu bstimmti Vorrusetzige erfillt. In dr Alemannische Wikipedia z. B. cha e jede mitwehle, wu unter eme Benutzername aagmäldet isch un zmindescht 10 sinnvolli Bearbeitige im Artikel-Namensruum gmacht het.

S Probläm bi sonige demokratische Wahle isch, ass e jede Benutzer anonym cha blybe, ass sich e Benutzer unter verschidene Benutzernäme chaa aamälde (mit sognannte Chaschperlipuppe) oder ass e Benutzername au vu verschidene Lyt cha brucht wäre. Wäge däm isch d Zueornig „ei Person – ei Stimm“ in dr Wikipedia us prinzipiälle Grind nit megli.

Meritokratischi Elemänt

E Teil vu dr organisatorische Strukture in dr Wikipedia glyche ere Meritokratii, ere Herrschaft vu Lyt, wu sich „verdient“ gmacht hän. E Byschpil doderfir sin d Aminischtratore (Ammanne). Si derfe Syte lesche oder schitze un Benutzter sperre. Go Ammann wäre muess s mer s Vertröue vu dr andere Benutzer haa un gwehlt wäre.

Ammanne hän aber sunscht kei bsunderi Stellig in dr Wikipedia, bi Abstimmige z. B. zelle ihri Stimme glyych viil wie die vu andere Benutzer.

Diktatorischi un plutokratischi Elemänt

Wär d Rächnig zahlt, het au meh z sage. Vor allem am Aafang vu dr Wikipedia ab 2001 het dr Jimmy Wales, dr Grinder vu dr Wikipedia, vil Gäld in des Projäkt inveschtiert un vil Froge sin in dr Aafangszyt wäge däm am Änd vu ihm entschide wore. Au di zentrale Grundsätz vu dr Wikipedia stamme urspringli vu ihm.

Mitr dr Grindig vu dr Wikimedia Foundation am 20. Juni 2003 het dr Wales d Bsitzrächt an dr Wikipedia-Domains un d Computeruusrischtig an d Wikimedia-Stiftig ibertrait. Wichtigi Entscheidige wäre syterhär nimi vum Wales elai troffe sundern vum Board of trustees.

Mittlerwyli chunnt s Gäld fir d Computeruusrischtig zum große Teil us Spände.

Technokratischi Elemänt

Was in dr Wikipedia megli isch hangt zem große Teil vu dr elektronische Megligkeite ab. D Software wird as Open Source-Projäkt programmiert vu frejwillige Programmierer. Die Entwickler hän natyrlig e große Yyfluss, weli Software-Features programmiert un dodermit umgsetzt wäre. Uf Mediazilla cha jeder mitdiskutiere

Weblink

• Wikimedia-Machtstruktur uf Meta-Wiki (uf Änglisch)