Wikipedia:Profil/Entwurf2
des isch e Entwurf fir e Nejfassig vum Wikipedia:Profil.
- Zentrali Grundsätz
- Was d Wikipedia nit isch
- Artikelrichtlinie
- Dialäktrichtlinie
- Neutrale Standpunkt
- Kei Theoriifindig
- CC-BY-SA 3.0 Unported-Lizenz
- GNU Freie Dokumentationslizenz
- Urheberrecht
- Dateschutz
- Wikiquette
- Namenskonvention
- Kategorie
- Wiä schriib ich guets Alemannisch?
- Rotschläg fir Ibersetzige
Di Alemannisch Wikipedia - e alemannischsprochigi Enzyklopedi mit Informatione iber Alemannisch un Informatione uf Alemannisch.
D Wikipedia isch e cheschtelosi Online-Enzyklopedi vu dr Wikimedia Foundation, ere gmeinnitzige Stiftig mit Sitz z Florida. Mittlerwyli git s d Wikipedia in iber 270 Sproche, eini dervu isch Alemannisch.
Di alemannisch Wikipedia isch e Enzyklopedi, wu in alleni Dialäktspiilarte vum alemannische Sprochruum gschribe wird. Des Projäkt bringt Mänsche häne wie däne vu dr Gränze zämme, us dr Dütschschwyz, us Sidweschtdytschland, em Elsass, em Vorarlberg un au us de Walserderfer z Norditalie. Di alemannisch Wikipedia isch sprochli wie dr alemannisch Sprochruum sälber, wie ne Matte voll mit Wildblueme, statt eme churzgstutzte änglische Wase: bi uns isch Viilfalt gwinscht.
Es derf also e jede in sym eigne Dialäkt Artikel verfasse. Bi regionali Theme sähn mir s gärn, wänn dr Artikel au im Dialäkt vu däre Gegnig gschribe isch.
Di alemannisch Wikipedia isch hit di umfangrychscht Internetsyte uf Alemannisch. Unser Ziil isch s, dass si s grescht un wichtigscht Internetportal rund um alemannischi Dialäkt wird, e Orientierigspunkt fir alli, wu sich fir alemannischi Dialäkt inträssiere.
Ei inhaltliche Schwärpunkt vu dr Alemannische Wikipedia sin Theme, wo eppis z due hän mit dr Regione, wu alemannisch Dialäkt gschwätzt wäre. Mir verliere derby aber d Wält nit us dr Auge un bhandle au andri Theme, wu wichtig sin un d Läser inträssiere. D Artikel sotte uf eme wisseschaftlige aber au allgmein verständlige Nivoo gschribe syy. Satirischi, gspaßigi oder umgangssprochligi Formulierige sin nit gwinscht, di alemannisch Wikipedia isch kei Spaßprojekt.
Eis vu unsre Ziil isch au d Sprochpfläg. Vor allem im Elsass un ganz bsundersch in dr italienische Walserderfer sin di alemannische Dialäkt hit stark gfehrdet un wäre allmeh vum Franzesisch bzw. vum Italienisch verdrängt. In dr Alemannische Wikipedia setze mir di alemannisch Sproch uf eme modärne Fäld yy un zeige dodermit, ass si au hite no ne Daug het. Villicht chenne mir eso ne chleine Byydrag leischte, ass es Aasäh vum Alemannisch iberall dert ghobe wird, wu Dialäkt vu modärne Schriftsproche oder regionale Umgangssproche bedrängt wird.