Willy Seiler

Dialäkt: Schwäbisch

Dr Willy Seiler (* 24. September 1930 z Stuegert, † 9. Juni 1988 en seira Geburtsstadt) ischt a deitscher Schauschbiiler, Senger ond Moderator gwäa. Sei greeschder Erfolg isch des Liadle Schaffe, schaffe, Häusle baue gwäa, wo-nr zamma mit seira Frau, dr Ruth Mönch, uff Schallpladda gsonga hôt.

Aus seim Leaba

Dr Willy Seiler ischt am 24. September 1930 em Stuegerter Stadtdoil Cannstatt – Bad hôt’s erscht ab 1933 ghoißa – uff d Welt komma. Er ischt grad amôl 16 Jôhr alt gwäa, dô hôt’r bei-ma Theater en seira Hoimetstadt a Roll em Kenderstick Emil und die Detektive vom Erich Kästner schbiila derfa. Bald druff hôt’r a Engagement beim dômôliga Siddeitscha Rundfunk (heit Südwestrundfunk) kriagt, wo-nr bei-ma Haufa Kender- ond Schualfunksendonge mitgwirkt hôt. Au bei de dômôls ibliche Bonde Ôbed, wo emmer samschdigs em Rundfunk ibrtraga wôrra send, hôt’r oft durchs Programm gfihrt, zerscht alloi ond schbäter mit seira Frau ond Kollegin Ruth Mönch.

1965 ischt em Willy Seiler ôbodda wôrra, a Schallbladd mit-em Titl Schaffe, schaffe, Häusle baue … uff dr A-Seit ond Mathilde, gib den Hammer her uff dr B-Seit uffzonemma. Dr Seiler hôt zuagsait; ond weil mr fir dia Uffnahma au noh a weibliche Stemm braucht hôt, hôt’s Ehepaar Seiler als Willy Seiler und Mathilde dui Pladd besonga. Dr Erfolg ischt so grauß gwäa, dass der Tonträger ibr 100.000-môl ibr da Ladadisch ganga ischt.

1968 hôt dr Seiler zom erschda Môl em-ma Fernsehschbiil mitgwirkt: En de ledschde zwoi Folga vo dr schwäbischa Sidfunk-Serie Die Chronik der Familie Nägele (gschriiba vom Eschtreicher Fritz Eckhardt, wo z Stuegert uffgwachsa ischt) hôt’r da jengschda Soh vom Familiaoberhaupt (gschbiilt vom Willy Reichert) vrkerpret. Schbätr hôt’r gsait, dui Roll hett-em a graußa Freid gmacht, weil se vom kenschtlerischa Standponkt her viil ôôschbruchsvoller gwäa wär als dia Conferenca, wo-nr vorher gmacht häb.

Firs Zwoide Deitsche Fernseha hôt s Ehepaar Seiler meh wia 40 Sketsch em schwäbischa Dialekt produziirt. Au beim Saarlendischa Rundfunk send dia zwoi etliche Jôhr lang ondr Vrtrag gschdanda. Fir dean Sender hend-se, ondrstitzt vo de Schwarzwälder Stockmihli Musikanten als Haus-Bänd, dui Volksmusik-Show-Reihe Im Krug zum grünen Kranze gmacht.

Am 9. Juni 1988 hôt dr Willy Seiler en seira Hoimetstadt seine Auga fir emmer gschlossa; grad amôl 57 Jôhr alt isch’r wôrra. Vrgraba wôrra ischt'r em Stuegerter Pragfriedhof. Schbäter hôt en deam Grab au sei Witwe Platz gfonda.

Seine Film

• 1968: Chronik der Familie Nägele
• 1986: Der Eugen
• 1987: Tatort: Eine Million Mäuse

A Auswahl vo seine Langschbiilpladda bzw. CDs

• Sing und lach mit – Frohgelaunt im Neuen Sound
• Im Krug zum grünen Kranze
• Schwarzwälder Vesper
• Die schönsten schwäbischen Volkslieder
• Echt schwäbisch – Schelmen-, Schnitz- und Lompaliedle
• Ruth Mönch und Willy Seiler singen die schönsten Volkslieder

Weblink

• Willy Seiler in de Internet Movie Database (änglisch)
• Dr Willy Seiler ond sei Frau Ruth Mönch bei youtube mit-em Liadle Schaffe, schaffe, Häusle baue
• S Grab vom Willy Seiler uff-em Stuegerter Pragfriedhof

Dä Artikel basiert uff ere fräie Übersetzig vu dere Version vum Artikel „Willy_Seiler“ vu de dütsche Wikipedia. E Liste vu de Autore un Versione isch do z finde.