Yaska
Dr Yaska (im Devanagari: यास्क Yāska) isch e Grammatiker und Lexikograaf vom alte Sanskrit gsi.
Vo sim Lääbe weiss me fasch nüüt. Er het öpen i dr Middi vom erschte Joortuusig vor Chrischtus im alte Nordindie gläbt.
Me könt vo ihm eis Wärch, s Nirukta. Das isch e Bestanddeil vo de Vedangas, wo me dozmol gschribe het für zum die alte rituelle Tegscht vom veedische Ritual z verstoo und vorschriftsmässig z tue. Es isch s eltischte bedüütende Wörterbuech zu de Veede.
Es isch em Yaska i sinere Schrift um d Härleitig, d Klassifikazioon, dr Uufbou und d Bedüütig vo de Wörter ggange. Er het erklärt, wie d Hauptwörter ursprünglech vo Dätikeitswörter chöme, us was für Deili d Wörter zämegsetzt sind, was es für glychbedüütendi Wörter (Synonym) git, und bsunders au, wie me d Wörter im Zämehang vo heilige Handlige bruucht. Er isch für d Idee gsi, ass d Wörter so wie au d Sätz do sin zum als Sümbol e Bedüütig z vermiddle, was au für di modärni Bedüütigsleer und Semiotik no wichtig isch.
S Nirukta isch eis vo de eltischte Büecher über d Etimology, im Sinn vo dr sproochleche und nid dr historische Worthärleitig, und über d Semantik, wo me kännt.
Em Yaska sis Wärch het spöter der grooss Sanskrit-Forscher Panini kritisch agluegt.
Literatur
ändere- Eivind Kahrs: On the study of Yaska’s Nirukta. Puna 2005.
- Johannes Bronkhorst: Etymology and magic: yāska’s nirukta, plato’s cratylus, and the riddle of semantic etymologies. In. Numen. International Review for The History of Religions, 48, 2001, S. 147-203.